Mijëra protestues dolën në rrugët e qytetit spanjoll të Valencias mbrëmjen e sotme, duke kërkuar dorëheqjen e liderit rajonal dhe duke e akuzuar atë për një reagim të dobët gjatë përmbytjeve që vranë të paktën 220 njerëz. “Mazon dorëheqje”, shkruhej në pankartën me të cilën protestuesit dolën para godinës së qeverisë së provincës së Valencias.
Ata bërtisnin “vrasës, vrasës” pasi përrenjtë vërshuan provincën juglindore në bregdetin e Mesdheut njëmbëdhjetë ditë më parë, duke vrarë një numër të madh njerëzish. Protesta u thirr nga organizatat e majta dhe sindikatat.
Carlos Mazon, një anëtar 50-vjeçar i Partisë Popullore konservatore, ka qenë në krye të provincës që nga vera e vitit 2023. Në Spanjë, ka një debat nëse 5 milionë banorët e rajonit u njoftuan në kohë me telefon celular. të mbërritjes së stuhisë vdekjeprurëse.
“Ai është plotësisht i paaftë”
Protestuesit akuzuan qeverinë se ka dërguar ndihma me vonesë në zonat e përmbytura, ku kërkimet për disa dhjetëra persona janë ende në vazhdim.
“Ai (Mazon) është plotësisht i paaftë,” tha një protestuese për transmetuesin publik TVE.
Në një moment ka pasur tensione mes protestuesve dhe policisë së ndërhyrjes para godinës së qeverisë në qendër të Valencias. Protestuesit hodhën sende të ndryshme dhe kërcënuan me fshesa për të pastruar baltën, ndërsa policia i përzuri me shkopinj.
“Unë e respektoj protestën. Kam respektuar gjithmonë protestat e banorëve”, tha Mazon, duke shtuar se protesta ishte e një “tipi politik”. “Por ua lë këtë protestuesve, i respektoj të gjitha këto”, shtoi ai.
Një protestë kundër tij është organizuar edhe në sheshin kryesor të Madridit. Përmbytjet në juglindje të Spanjës janë fatkeqësia më e madhe natyrore në atë vend në dekadat e fundit.
