Shkruan: Dr. Muhamet KELMENDI
Nga administrata e z.Tramp si Sekretar i Shtetit po thuhet se do të jetë z. Mirco Rubio. Z. Rubio njihet si person i dorës së fortë, i cili mbështetet në diplomaci dhe në forcë si mjet i presionit politik. Ai më herët kishte deklaruar se Forcat e Armatosura Amerikane e kishin ndalur nacizmin gjerman dhe komunizmin si të këqija të njerëzimit. Në këtë vazhdë ka përmendur z. Rubio si të keqe të madhe edhe “spastrimin etnik të serbëve në Kosovë” , që e kishte ndalur gjithashtu SHBA.
Kuptohet se z. Tramp i cakton konturat e politikës së jashtme. Mbi këto do të veprojë e tërë administrata e SHBA-ve. Natyrisht se në politikën e jashtme veprohet si kolektivitet i udhëhequr nga z. Tramp. Këtej shpresohet se vija politike e SHBA-ve kudo në vatrat e luftës dhe të krizës do të jetë në anën e të drejtës. Kjo, ndikon dukshëm që edhe në raport të Kosovës me shtetin serb të fitojë e drejta dhe të ruhet shteti i pavarur dhe sovran i Kosovës. Nuk mendoj se Uashingtoni do të ndjekë politikë tjetër nga ajo e deritashmja. Por, me siguri se do të kemi një agresivitet më të theksuar. Qëndrimet dhe vendimet e z. Tramp janë shumë më të vendosura, më dinamike dhe zbatimi i tyre do të jetë i domosdoshëm. Mendohet se me z.Tramp në këtë politikë nuk do të ketë luhatje. SHBA ka investuar shumë në këtë anë të Evropës. Kosova u çlirua nga UÇK dhe thjesht nga SHBA.
Së këndejmi priten përfundime të qarta për investimet e bëra në Kosovë nga ana e SHBA-ve.
