Analisti Dritro Arifi konsideron se me ardhjen e presidentit, Donald Trump në pushtet do të kërkohen reforma në politiken e jashtme të Bashkimit Evropian, teksa për vendet e Ballkanit Perëndimor do të jetë një paketë më e zgjeruar, por që do të kërkohet veprim i shpejtë.
Duke folur për ndikimet e administratës Trump në Kosovë, Arifi tha se mund të ketë marrëveshje në paraverën e ardhshme sepse sipas tij presidenti Trump dëshiron që ta korrë një fitore të shpejtë dhe që të shkojë tutje me suksese tjera në vatrat ku janë më problematike.
“Qeveria që do të vie pas zgjedhjeve të 9 shkurtit duhet të matet mirë dhe të jetë e përgatitur për shumë kompromise që ta marrim qëllimin final, njohjen reciproke ligjërisht të obligueshme nga Serbia. Ky duhet të jetë synimi jonë final, e jo të merremi me gjëra sekondare të cilat nuk e zgjidhin problemin”, tha Arifi në një intervistë në emisionin “Info Plus” në RTK.
Sipas tij, nëse kjo qeveri mbetet në pushtet me qasje të njëjtë, detyrimisht do të izolohet, por edhe do të sanksionohet sepse SHBA-të nuk kanë më kohë të humbin me gjëra për të cilat ata mendojnë që do të duhej të kishin përfunduar.
“Një pjesë të fajit të madh e ka edhe Bashkimi Evropian i cili nuk po merr vendime dhe nuk është i aftë që të paktën një problem në oborrin e vet ta rregullojë si duhet. Ky nuk është vetëm faji i Kosovës, por edhe i BE-së që nuk po ka guxim të ecë tutje. Por, SHBA nuk ka kohë dhe para të humb në vende që sipas tyre do duhej të përfundonin këto probleme të vogla sepse Kosova dhe Serbia nuk kanë probleme të mëdha. Problemi i vetëm është që Serbia ta njohë Kosovën. Shtetet janë zotuar për marrëveshje dhe tani ato duhet të zbatohen. Zbatimi tani do ta ketë një pikë elementare që ta zgjidhë problemin përfundimtar që Ballkani të relaksohet dhe SHBA të vazhdoj tutje. Mendoj që në ketë aspekt do të ketë dinamikë të shtuar të SHBA –ve”, nënvizoi Arifi.
