Vetëm gjatë një dite rreth 70 persona më diabet kërkojnë ndihmë mjekësore, kurse brenda vitit rreth 15 mijë pacientë.
Kështu kanë bërë me dije për Radio Kosovën nga Klinika e Endokrinologjisë në QKUK me rastin e Ditës Botërore të Diabetit, teksa prindërit e fëmijëve me diabet në Kosovë apelojnë te Ministria e Shëndetësisë që të krijojnë kushte më të mira për trajtimin e diabetit.
Ndonëse në Kosovë nuk kemi të dhëna të sakta se sa persona vuajnë nga diabeti, endokrinologët thonë se ka rritje të rasteve. Diabeti është një sëmundje kronike e që karakterizohet me çrregullim të metabolizmit. Kështu ka thënë për Radio Kosovën endokrinologu Agron Spahia, i cili tha se ekzistojnë disa tipa të diabetit, por dy janë më kryesorët : Diabeti i tipit 1 dhe Diabeti tip 2. Ai thotë se shifrat në botë janë shqetësuese për sa u përket personave me diabet.
“Të dhënat e fundit epidemiologjike janë mjaft shqetësuese sa i përket numrit të pacienteve me diabet si dhe paraqitjes së rasteve të reja me sëmundjen e sheqerit. Ç’do i dhjeti banor në gjithë botën, me siguri edhe tek ne në Kosovë, meqenëse nuk kemi të dhëna të sakta është i prekur nga sëmundja e sheqerit. E që brenda njëzet viteve pritet që ky numër i pacienteve të rritet ne shtatëqind milion njerëz në mbarë botën”, ka thënë Spahiu.
Në Ditën Botërore të Diabetit, prindërit e fëmijëve me diabet në Kosovë apelojnë institucionet shëndetësore, gjegjësisht Ministrinë e Shëndetësisë, që të ofrojnë kushte më të mira për trajtim të diabetit për fëmijët, pasi thonë se sëmundja e diabetit ka një kosto të lartë.
“Shpenzimet që kanë të bëjnë më diabetin janë të mëdha. Senzoret që i blejmë për monitorimin e sheqerit për djalin tonë, një senzor kushton 70 euro dhe zgjatë vetëm 14 ditë, ndërsa për një muaj na duhen me shumë, që na kushtojnë 140 euro vetëm për senzor pa i përfshire shpenzimet e tjera. Në Ditën Botërore të Diabetit i bëj thirrje institucioneve që këta fëmijë, që janë të këtij vendi, duhet t’u zgjatët dora e ndihmës nga ana e shtetit sepse këta fëmijë janë fëmijë të këtij vendi dhe do të kontribuojnë për këtë vend”, kanë thënë prindërit.
Në Ditën Botërore të Diabetit endokrinologët apelojnë që të ketë kujdes të shtuar me matjen e sheqerit në gjak.
Ata bëjnë me dije se rrezikshmëria më e madhe e diabetit është që personat me këtë sëmundje të mos diagnostikohen në gjendje të komplikimit akut që ndryshe thirret ketoacidozë diabetike dhe kjo gjendje sipas mjekëve, është e rëndësishme që të parandalohet e sidomos të moshat e reja.
