Filarmonia e Kosovës sonte në Pallatin e Kulturës ‘Asim Vokshi’ në Gjakovë, mban koncertin ‘Filarmonia në Lëvizje’.
Dirigjenti Hajrullah Syla tha për programin e mëngjesit të RTK-së, se publiku gjakovar do të shijojë një koncert fantastik.
“Filarmonia e Kosovës me paraqitjet e saj është gjithmonë gati. Mbrëmë e kemi pasur provën gjenerale këtu në Gjakovë, e cila shkoi mjaft mirë, dhe besoj se publiku gjakovar do të shijojë një koncert fantastik nga kori, orkestra dhe solistët,” u shpreh Syla.
Për programin e koncertit, dirigjenti tregoi se ngjarja do të nisë me Uverturën “William Tell” të Gioachino Rossinit, e interpretuar nga orkestra e Filarmonisë së Kosovës. Pas kësaj, skena do t’i takojë korit dhe solistëve që do të interpretojnë veprën madhështore “Stabat Mater”.
Në mesin e solistëve të mbrëmjes do të jenë emra të njohur si sopranoja Besa Llugiqi, mezosopranoja Albane Carrere dhe të tjerë.
“Programi sonte është mjaft i pasur dhe i këndshëm, besoj që publiku do ta shijojë. Lëvizja e Filarmonisë është pritur shumë mirë, dhe deri në fund të vitit do të vazhdojmë të performojmë në qytete të ndryshme”, theksoi Syla.
Sipas tij, kjo është një mundësi për artdashësit e Gjakovës të përjetojnë një performancë të jashtëzakonshme të Filarmonisë së Kosovës.
