Në hapësirat e shkollës fillore “Elena Gjika” u bë promovimi i albumit me këngë të njohura për fëmijë të kompozitorit Reshat Randobrava.
Të pranishëm ishin familjarë, ish nxënës, mësimdhënës e nxënës të kësaj shkolle.
Ky promovim u bë për nder të 85-vjetorit të lindjes së kompozitorit Reshat Randobrava. Ky album-CD përmban 16 këngët e kompozuara prej tij, të kënduara nga shumë artistë të njohur të skenës.
Me këtë rast, ndonëse në moshë të shtyrë, kompozitori Randobrava falënderoi të gjithë ata që ndihmuan në realizimin e këtij albumi.
“Të nderuar miq, dashamirë të artit muzikorë. Ju falënderoj që morët pjesë sot në promovimin e CD-së Këngë Hite për Fëmijë. Me këtë rast dua të falënderoj Ministrinë e kulturës, rinisë dhe sporteve drejtoreshën Jehona Shyti, Drejtoratin për kulturë të Komunës së Prishtinës”, ka thënë Randobrava.
“Kjo pra është CD-ja Këngë Hite për Fëmijë, që përbëhet nga 16 këngë. Janë këngë të zgjedhura hite të cilat janë incizuar në Radio Televizionin e Prishtinës ku kompozitori ynë Randobrava ka punuar një kohë të gjatë faktikisht që nga 1972 deri më 1990”, ka thënë këngëtarja Fitnete Tuda.
“Kam kënaqësi të madhe që ka përzgjedh shkollën tonë, shkollën më të vjetër të Prishtinës që ta promovoj albumin dhe vlerat e veta, pra kompozitori jonë i shquar Reshat Randobrava”, ka thënë Agnesa Rashiti Glloboder, zv.drejtoreshë e shkollës.
Ky promovim u pasurua nga kori i nxënësve me një ekspozitë me punime të frymëzuara nga këngët e këtij albumi.
