Rrjeti i Organizatave të Shoqërisë Civile për Arsimin Parauniversitar (ROSCAP) ka shprehur shqetësim të thellë për qasjen populliste dhe të papërgjegjshme të partive politike në Kosovë, të cilat po përdorin arsimin dhe mirëqenien e fëmijëve si mjete për përfitime elektorale.
ROSCAP thekson se partitë kanë manipuluar publikun përmes dezinformimit dhe distancimit nga nismat e tyre mbi edukatën seksuale, duke thelluar krizën në sistemin arsimor.
Në një deklaratë, ROSCAP ka kritikuar qëndrimet kontradiktore të partive kryesore, të cilat, ndonëse kanë miratuar dhe promovuar doracakët për edukatën seksuale në periudha të ndryshme, tani akuzojnë njëra-tjetrën për përfitime politike.
Organizata ka bërë thirrje për dialog të hapur dhe profesional mbi këtë temë të rëndësishme dhe ka kërkuar shpalljen e arsimit si prioritet kombëtar për të adresuar sfidat kritike të sektorit. /Kosovatimes/
