“Lajmet e rrejshme dhe verifikimi i fakteve në mediat online” ishte tema që u diskutua në një tryeze të organizuar nga Këshilli i Mediave të Shkruara të Kosovës dhe OSBE-ja. Në këtë tryezë u tha se sfidë për parandalimin e lajmeve të rreme është zhvillimi i hovshëm i teknologjisë.
Drejtori ekzekutiv i Këshillit të Mediave të Shkruara të Kosovës, Imer Mushkolaj, tha se për rreth 50 media online kanë adresuar lajme të cilat nuk janë të plota dhe të gjitha vendimet janë marrë në kodin e mediave të shkruara të Kosovës.
“Kemi parasysh që lajmi mbetet lajm dhe rregullat e raportit janë rregulla të raportit, por lajmi mbetet bazike siç e mësojmë në shkollat e gazetarisë. Vitet e fundit jemi dëshmitar të mocionit të ri që ka të bëjë me verifikimin e fakteve por duke pasur parasysh situatën ku gazetarët mund të jenë qytetarë të zakonshëm është e rëndësishme që të ketë mekanizëm shtesë të verifikueshëm”, tha Mushkolaj.
Shefi i Departamentit të Gazetarisë në Universitetin e Prishtinës, Muhamet Jahiri derisa tha se sfidë e dezinformimit është zhvillimi i Inteligjencës Artificiale kërkoi të formohet një task-forcë dhe të ketë një vetërregullim në çdo redaksi.
“Ne jemi secili pjesë e hapësirë ku analizojmë dhe gjykojmë dhe problemi kryesor është me ato media që nuk janë kredibile që përdorin hapësirë publike për qëllime individuale. Keqpërdorimi i teknologjisë është rezultat i zhvillimit të teknologjisë ku po sfidohemi me ndryshimin e saj siç është Inteligjenca Artificiale”, tha Jahiri.
E për Brikenda Rexhepi, kryeredaktore e Grupit Koha përdorimi i lartë i teknologjisë nga gazetarët e rinj, mbetet sfidë e të gjitha redaksive. Rexhepi shtoi se parim kryesor është të verifikohet lajmi para se të publikohet.
