Instituti Hidrometeorologjik i Kosovës ka njoftuar se të enjten parashihen reshje të dendura të shiut dhe të borës në tërë territorin e vendit. IHK bën apel për kujdes të veçantë për pjesëmarrësit në komunikacion, dhe rekomandon bartjen e pajisjeve dimërore.
“Në orët e para të ditës së enjte (pas mesnate),parashihen reshje të dendura të shiut dhe borës në gjithë vendin. Rekomandohet që ngasësit e veturave të bartin pajisjet dimërore dhe të kenë kujdes, sidomos në rrugët e viseve të larta dhe mesatare” thuhet në njoftimin e IMH-së.
Të enjten pritet të mbretërojë mot kryesisht i vranët dhe me reshje të dendura të shiut dhe borës. Reshjet parashihen të përfshijnë gjithë territorin e Republikës së Kosovës.
Sipas njoftimit të IMH-së, temperaturat minimale do të lëvizin ndërmjet -1 deri 2 gradë Celsius, ndërsa maksimalet e ditës parashihen të lëvizin ndërmjet 3 deri 6 gradë Celsius.
Do të fryjë erë nga drejtimi I verilindjes me shpejtësi 1-6m/s.
