Një gjyqtar në Nju Jork pranoi sot kërkesën e Donald Trump për të pushuar çështjen penale kundër tij për pagesat ndaj një ylli porno, në dritën e fitores së tij në zgjedhjet presidenciale në SHBA, dhe shtyu për një kohë të pacaktuar dënimin në atë rast.
Trump, 78 vjeç, u shpall fajtor në këtë rast në fillim të këtij viti dhe ishte planifikuar të dënohej më 26 nëntor.
Gjyqtari i Gjykatës së Lartë të Shtetit të Nju Jorkut, Juan Merchan tha se një seancë dëgjimore e planifikuar për të martën nuk do të mbahet për t’u dhënë kohë avokatëve për të paraqitur dokumente brenda një afati që skadon në fillim të dhjetorit. Ai nuk ka specifikuar një datë të re për dënimin.
Avokatët e Trump kërkojnë që çështja të pushohet
Prokurorët nga zyra e Prokurorit të Qarkut të Manhatanit, Alvin Bragg, në fillim të kësaj jave i kërkuan gjyqtarit Merchan të konsideronte shtyrjen e të gjitha procedurave në këtë çështje derisa Trump të përfundojë mandatin e tij katërvjeçar si president, i cili fillon më 20 janar.
Avokatët e republikanit Trump argumentuan se çështja duhet të pushohet sepse procedimi penal do të ishte një “pengesë antikushtetuese” për aftësinë e tij për të qeverisur ndërsa ishte në detyrë.
Zyra e Bragg tha se do të kundërshtonte pushimin e çështjes, por ranë dakord që Trump duhet të lejohet të paraqesë rastin e tij me shkrim.
Merchan të premten i dha afat Trumpit deri më 2 dhjetor për të paraqitur një mocion për pushimin e çështjes dhe u dha prokurorëve deri më 9 dhjetor për t’u përgjigjur. /Kosovatimes/
