Ushtruesi i Detyrës së Kryeprokurorit të Shtetit, z. Besim Kelmendi mori pjesë ceremoninë e lansimit të udhëzuesit për matjen e dënimit nga Gjykata Supreme.
Gjatë fjalës së tij në këtë ceremoni, U.D. kryeprokurori Kelmendi theksoi se miratimi i udhëzuesit për matjen e dënimit është një nga hapat me të rëndësishëm që sistemi i drejtësisë mund të bëjë në harmonizimin e praktikave në matjen e dënimit.
Për këtë qëllim edhe Kryeprokurori i Shtetit ka lëshuar një udhëzim të detyrueshëm, i cili e qartëson rolin dhe kontributin e Prokurorit të Shtetit në matjen e dënimit.
U.D. kryeprokurori Kelmendi potencoi se një obligim i tillë tanimë është formalizuar edhe më shumë me ndryshimet e fundit të Kodit të Procedurës Penale, sipas të cilit prokurorit i jepet mundësia të propozoj edhe lartësinë e dënimit, andaj njoftoi se në çdo rast kur ka takime me kryeprokurorë dhe prokurorë iu bënë thirrje atyre që këtë udhëzues ta konsiderojnë si mjet më shumë vlerë për punën e tyre.
Tutje, Ushtruesi i Detyrës së Kryeprokurorit të Shtetit, z. Besim Kelmendi pohoi se ky udhëzues mundëson zbatimin e ligjit në mënyrë të drejtë dhe të balancuar, sepse çdo veprim i Prokurorit të Shtetit duhet të jetë në përputhje me parimet e drejtësisë, ligjet në fuqi dhe standardët e këtij udhëzuesi, duke shtuar se kjo nuk është një detyrë e thjeshtë, por është një përgjegjësi e madhe që kërkon përkushtim të pakushtëzuar për secilin.
Në fund të fjalës së tij, U.D. kryeprokurori Kelmendi, falënderoj Gjykatën Supreme, Departamentin e Drejtësisë në Ambasadën Amerikane –OPDAT dhe të gjithë ata që ndihmuan në finalizimin e këtij projekti madhor. /Kosovatimes/
