Dogana dhe Policia e Kosovës kanë arritur që të parandalojnë një rast kontrabande nga postat e shpejta të cilët kanë bartur mall të kontrabanduar përmes rrugëve ilegale nga Maqedonia e Veriut.
Pas informacioneve nga burimet zyrtare Task Forca e përbërë nga Dogana e Policia kanë vëzhguar e përcjellë një automjet me targa vendore i cili, sipas njoftimit nga Dogana e Kosovës, mallin e kontrabanduar e kishin marr në zonën e brezit kufitar mes Republikës së Maqedonisë së Veriut e Republikës së Kosovës, në zonën e Vitisë.
“Nga njësitet e lartcekura është arritur të ndalohet në orët e vona automjeti i dyshuar afër depos në Prishtinë. Gjatë kontrollit është parë se kishte të ngarkuara mallra të ndryshme si: dronë, jelek antiplumb, atlete të falsifikuara, çajra për dobësim, tekstil të ndryshëm etj. Vlera e mallrave sipas faturave dhe tregut është mbi 25 mijë euro”, bëhet e ditur në njoftim.
Lidhur me rastin të gjitha veprimet janë ndërmarrë në bashkëpunim me Prokurorinë e Shtetit, derisa mallrat dhe automjeti janë dërguar në Terminalin Doganor. /Kosovatimes/
