Sipas informacioneve të Reuters nga katër burime anonime, Grenell mund të luajë një rol kyç në përpjekjet e Trump për t’i dhënë fund luftës, nëse zgjidhet në këtë pozicion.
Trump aktualisht po shqyrton mundësinë e formimit të një delegacioni special për konfliktin ukrainas, i cili nuk ekzistonte deri më tani. Megjithatë, vendimi nuk është marrë ende dhe Grenell nuk është i vetmi kandidat për këtë rol. Edhe nëse Trump vendos të krijojë pozicionin, nuk është e garantuar që Grenell do ta pranojë nominimin.
Gjatë fushatës zgjedhore, Trump premtoi një zgjidhje të shpejtë të konfliktit në Ukrainë, por nuk zbuloi detajet e strategjisë së tij. Pozicionet e kaluara të Grenellit, si propozimi për krijimin e “zonave autonome” si një zgjidhje e mundshme për konfliktin, mund të shkaktojnë shqetësim tek udhëheqësit ukrainas. Gjithashtu, Grenell nuk e mbështeti idenë e anëtarësimit të afërt të Ukrainës në NATO, një pozicion që ai ndan me shumë nga aleatët e Trump.
Kush është Richard Grenell?
Richard Grenell është një diplomat dhe politikan amerikan, i cili njihet për bashkëpunimin e ngushtë me Donald Trump. Ai ka qenë ambasador i SHBA-së në Gjermani dhe në vitin 2020 ka mbajtur për një kohë të shkurtër postin e ushtruesit të detyrës së drejtorit të Shërbimit Informativ Kombëtar.
Ai kishte një rol veçanërisht të rëndësishëm si i dërguar i posaçëm presidencial për negociatat ndërmjet Serbisë dhe Kosovës. Grenell ishte një figurë kyçe në procesin që çoi në nënshkrimin e Marrëveshjes së Uashingtonit në vitin 2020, që synonte normalizimin e marrëdhënieve ekonomike midis Beogradit dhe Prishtinës.
Grenell njihet për lidhjet e tij të ngushta me autoritetet serbe dhe presidentin Aleksandar Vuçiq. Gjatë përfshirjes së tij në negociata, ai shpesh theksoi rolin e Vuçiqit në arritjen e një marrëveshjeje. Dashuria e tij për Vuçiqin shkaktoi polemika dhe kritikët e akuzuan atë për favorizimin e Serbisë në kurriz të Kosovës.
Grenell është konsideruar më parë për poste të nivelit të lartë në administratën Trump, duke përfshirë postin e Sekretarit të Shtetit. Megjithëse Trump përfundimisht e emëroi atë në poste të tjera, Grenell mbeti një nga aleatët e tij më të ngushtë politikë.
