Derisa prej kohësh partitë politike kanë nisur parafushatën e në shumicën prej komunave po zbulojnë edhe emrat që do të jenë në listat zgjedhore për zgjedhjet e 9 shkurtit, të parat që po mbahen në afat të rregullt zgjedhor, atyre u kanë mbetur edhe 17 ditë kohë që t’i dorëzojnë pranë KQZ-së kërkesat e tyre për t`u certifikuar në këto zgjedhje.
11 dhjetori është afati i fundit që e ka përcaktuar institucioni që organizon zgjedhjet edhe për listat me emrat e kandidatëve për deputetë nga partitë politike, koalicionet, nismat qytetare e kandidatët e pavarur.
Deri tash asnjë subjekt politik nuk i është drejtuar KQZ-së për certifikim, periudhë që u hap qysh më 1 shtator. Këtë e bëri të ditur për RTKlive zëdhënësi i KQZ-së, Valmir Elezi.
“Deri më 11 dhjetor të këtij viti, subjektet politike (partitë politike, koalicionet, nismat qytetare dhe kandidatët e pavarur) duhet të dorëzojnë në Komisionin Qendror të Zgjedhjeve kërkesat e tyre për certifikim për pjesëmarrje në Zgjedhjet për Kuvendin e Kosovës që do të mbahen më 9 shkurt 2025. Gjithashtu, gjatë kësaj periudhe, subjektet politike duhet të dorëzojnë edhe listat e tyre me emrat të kandidatëve për deputetë. Kjo periudhë ka filluar më 1 shtator, por mund t’iu konfirmoj se deri më tani nuk kemi pranuar ndonjë aplikim nga ana e subjekteve politike”, theksoi ai.
Derisa, mijëra kandidatë në parti të ndryshme politike synojnë t’i hyjnë garës për të zënë një ulëse në Kuvendin e Kosovës, ata do të mund të certifikohen vetëm pasi të verifikohen nga Këshilli Gjyqësor i Kosovës.
Kjo kërkesë do t’i shkojë këtij organi gjyqësor nga KQZ-ja, duke u bazuar në Ligjin për Zgjedhje.
“Në nenin 30 të Ligjit për Zgjedhje të Përgjithshme, theksohet se kandidat nuk mund të jetë një person nëse “është dënuar në 3 vjetët e fundit me vendim gjyqësor të formës së prerë për vepër penale, me një ose më shumë vjet burgim efektiv”. Prandaj, me qëllim të zbatimit të këtij përcaktimi ligjor, do të kërkojmë nga KGjK-ja që të verifikojë listën e kandidatëve nëse ndonjëri prej tyre nuk është në përputhje me këtë kufizim ligjor”, tha Elezi për RTKlive.
