KMDLNj kërkon hetime për ndarjen e subvencioneve nga Ministria e Bujqësisë
Ministria e Bujqësisë, me një buxhet prej mbi 300 milionë eurosh për subvencionimin e bujqësisë, po përballet me akuza për ndarje jotransparente të fondeve. KMDLNj thekson se ka dyshime të bazuara për nepotizëm, politizim dhe klientelizëm në ndarjen e këtyre subvencioneve, të cilat janë vërtetuar në së paku gjashtë raste. Presioni publik detyroi ministrin e Bujqësisë, Faton Peci, të pezullojë përkohësisht fondet, veprim që KMDLNj e konsideron një përpjekje për të shmangur përgjegjësinë ligjore dhe për të qetësuar opinionin publik.
KMDLNj ka kërkuar publikimin e listës së përfituesve dhe hetime të plota nga Prokuroria e Shtetit. Organizata paralajmëron se mosveprimi institucional dhe mbulimi i dyshimeve për korrupsion do të dëmtojnë besimin publik.
KMDLNj kritikon RTK-në për politizim dhe linçim të mediave
Radiotelevizioni i Kosovës (RTK), një institucion që mbështetet plotësisht nga buxheti shtetëror, është akuzuar për ndërhyrje politike në politikat editoriale dhe për ndjekje të mendimit opozitar. KMDLNj ka denoncuar një rast ku RTK ka linçuar publikisht gazetat “Nacionale” dhe “Periskopi”, duke i akuzuar për financim nga Serbia dhe Rusia, bazuar në informata nga një media boshnjake.
Sipas KMDLNj, skandali përfshiu struktura të AKI-së (Agjencia e Kosovës për Inteligjencë), të cilat dyshohet se ofruan materiale për diskreditimin e mediave opozitare. Megjithëse drejtori i AKI-së mohoi përfshirjen në Komisionin për Mbikëqyrje të AKI-së, regjistrime të publikuara tregojnë të kundërtën, duke krijuar një situatë të paqartë për publikun.
KMDLNj e cilëson këtë ndërhyrje si një shkelje të rëndë të lirisë së fjalës dhe kërkon që Prokuroria e Shtetit të nisë hetime të menjëhershme. Personat e përfshirë duhet të pezullohen deri në përfundimin e procesit hetimor, për të garantuar transparencën dhe llogaridhënien.
KMDLNj apelon për mbrojtjen e lirisë së shprehjes dhe mospërdorimin e institucioneve shtetërore për linçim mediatik, duke theksuar se veprime të tilla janë të papranueshme në një vend demokratik, si Kosova. /Kosovatimes/
