Një Mjek që u arrestua në Berlin në gusht tani dyshohet se ka vrarë tetë pacientë dhe në disa raste ka tentuar të mbulojë provat duke vënë zjarre, thanë sot hetuesit gjermanë.
Mjeku i paidentifikuar, i cili ishte pjesë e ekipit të kujdesit paliativ, dyshohej në momentin e arrestimit se vrau katër pacientë të moshuar në muajt qershor dhe korrik dhe më pas tentoi t’u vinte zjarrin banesave me pak a shumë sukses.
Janë zbuluar edhe katër raste të tjera
Policia dhe prokurorët thanë sot se rastet shtesë dolën në sipërfaqe gjatë shqyrtimit të dosjeve të pacientëve dhe kryerjes së ekzaminimeve mjeko-ligjore të viktimave të dyshuara, dy prej të cilave u zhvarrosën.
Në rastin e parë ai dyshohet se i ka dhënë 70-vjeçarit një përzierje vdekjeprurëse droge në muajin janar. Në një rast të ngjashëm në fillim të muajit prill, viktima ishte një grua 61-vjeçare. Disa javë më vonë, ai vrau një burrë 83-vjeçar në dhomën e tij në një bujtinë në Berlin me një përzierje droge.
Në rastin e katërt ka vrarë një 70-vjeçare në banesën e saj në qershor dhe më pas i ka vënë flakën. Zjarrfikësit arritën të parandalojnë përhapjen e zjarrit në pjesën tjetër të ndërtesës.
Fillimisht ai u akuzua për vrasje, por…
Mjeku 40-vjeçar u arrestua fillimisht me dyshimin për vrasje, zjarrvënie dhe tentativë zjarrvënie. Prokurorët thanë se tani po i trajtojnë rastet si vrasje sepse i dyshuari duket se nuk ka pasur motiv tjetër përveç vrasjes së pacientëve.
Emri i të dyshuarit nuk është bërë i ditur, në përputhje me rregullat gjermane të privatësisë. Prokurorët thonë se për momentin ai po mbrohet duke heshtur.
