Kryeministri Albin Kurti ka thënë se po punohet që t’u sigurohet furnizimi me energji elektrike dhe ujë të pijshëm për qytetarët e vendit.
Në një postim në Facebook, Kurti ka shpërndarë një video të ministres së Ekonomisë, Artane Rizvanolli, e cila ka thënë se shpreson se së shpejti do të fillojë furnizimi me ujë së paku në disa prej komunave.
“Institucionet dhe ndërmarrjet publike të Republikës së Kosovës janë duke punuar me dedikim për të garantuar siguri të furnizimit me energji elektrike dhe ujë të pijshëm për të gjithë qytetarët”, ka shkruar Kurti.
Kurse, ministrja Rizvanolli ka theksuar se 24 orë pas sulmit terrorist në kanalin e Ibër-Lepencit, prurjet e ujit në KEK kanë arritur nivele optimale për furnizim me ujë të TC “Kosova B”. Me këtë rast, sipas saj, Ibër-Lepenci ka rifilluar furnizimin e fabrikave të ujit në rajonet e Mitrovicës dhe Prishtinës.
“Furnizimi me ujë për qytetarët e rajonit të Mitrovicës tashmë ka filluar, ndërsa gjatë orëve në vijim pritet të përmirësohet furnizimi edhe në komunat e prekura të rajonit të Prishtinës, përfshirë Fushë Kosovën, Drenasin dhe Obiliqin}, ka theksuar ajo.
