Si të përshpejtohet gjykimi i krimeve të luftës dhe të sigurohet drejtësi për viktimat, ishte tema qendrore e konferencës mbi procesimin e krimeve të luftës në hapësirat e ish-Jugosllavisë, mbajtur në Beograd, në organizim të Fondit për të Drejtën Humanitare.
Përfaqësuesit e institucioneve gjyqësore rajonale dhe shoqërisë civile vlerësuan se vullneti politik dhe bashkëpunimi rajonal duhet të jenë përparësi për të kapërcyer pengesat e mosndëshkimit dhe për të nxitur pajtimin në Ballkanin Perëndimor.
Është e domosdoshme të përshpejtohen proceset gjyqësore dhe të forcohet bashkëpunimi midis vendeve të rajonit, për të siguruar drejtësi dhe pajtim, u tha në një konferencë mbi procedimin e krimeve të luftës në hapësirat e ish-Jugosllavisë.
“Serbia dhe vendet e tjera të rajonit duhet ta mbështesin përshpejtimin e procedurave për krimet e luftës. Bashkëpunimi rajonal midis Serbisë, Bosnjës, Kroacisë dhe Kosovës është çelësi për t`i kapërcyer pengesat e mosndëshkimit dhe për të ndërtuar besimin. Ky proces mbetet çështje kyçe për integrimin evropian të rajonit”, tha Crtomir Fisinger, shefi i Seksionit Politik të Delegacionit të BE-së.
Përfaqësuesit e shoqërisë civile theksojnë se është e nevojshme të sigurohet drejtësia për viktimat dhe të dërgohet një mesazh i qartë se krimet e luftës nuk mund të mbeten pa u ndëshkuar.
“Pritshmëritë kanë qenë të mëdha kur filluan proceset gjyqësore, por sukseset janë matur me hapa të vegjël. Problemet, si mungesa e vullnetit politik dhe vonesat procedurale, vazhdojnë të jenë pengesa serioze për të gjithë rajonin”, tha Nenad Golçevski, drejtor ekzekutiv i Fondit për të Drejtën Humanitare.
“Në pushtet janë ende njerëz që nuk kanë interes për të vendosur një rend ligjor, sepse kjo nënkupton përballjen me të kaluarën. Serbia jeton prej kohësh në një gjendje mohimi, dhe kjo ndikon drejtpërdrejt në proceset për krimet e luftës”, tha Tomisllav Markoviq, gazetar dhe shkrimtar.
Prokurorët aktualë dhe ish-prokurorët nga Serbia, Bosnja e Hercegovina, Kroacia dhe Kosova pajtohen se rezultatet deri tani nuk janë të kënaqshme, pavarësisht rritjes së numrit të aktakuzave. Si pengesa kryesore përmenden kalimi i kohës, i cili vështirëson mbledhjen e provave dhe dëshmive, si dhe problemet e koordinimit ndërmjet institucioneve gjyqësore në rajon.
