Analistët politikë dhe të sigurisë, kanë tërhequr vërejtjen që institucionet e shtetit të Kosovës të jenë shuamë vigjilente dhe të mobilizuara për tu mbrojtur dhe kundërvënë një sulmi eventual nga ana e Serbisë, kundër shtetit të Kosovës, pas sulmit të fundit terrorist në stabilimentet e kanalit Iber Lepenc. Një sulm serb kundër Kosovës mundë të provokohet sipas njohësve të rrethanave, duke përdorë skenar të ngjashëm nga Serbia me atë që përdori Rusia kundër Ukrainës.
“Rusia sulmoi Ukrainën përmes luftës energjetike, dhe tani Serbia sapo përdori të njëjtën taktikë kundër Kosovës në Zveçan. Energjia është arma e re në konfliktet hibride, duke sulmuar sovranitetin dhe stabilitetin. BE, SHBA dhe NATO duhet të reagojnë menjëherë”, thotë Gurakuç Kuçi, Hulumtuesi i Lartë në Institutin për Studime të Luftës Hibride “OCTOPUS”.
Serbia kundër Kosovës me fillimin e taktikës së luftës guerile
Edhe profesori i së drejtës analist i zhvillimeve politike në vend, Muhamet Kelmendi, thekson se sulmi terrorist në Uglare të kanalit furnizues me ujë për Kosovën është fillimi i një lufte të ashpër të shtetit serb.
“U sulmuan kanali i ujësjellësit të ujit për Termocentralin B dhe të qyteteve të Rrafshit të Kosovës. Shpërthimi i bërë në Uglar është vetëm fillimi i një lufte të ashpër guerile me elemente terroriste të shtetit serb. Sulmet dhe shkatërrimet e infrastrukturës në Kosovë, të objekteve shtetërore dhe të njerëzve të uniformuar e pushtetarëve do të thellohet”, paralajmëron Kelmendi.
Sipas tij, me njësitet e veta që mendohet se shteti serb i ka nëpër kisha dhe te qytetarët serbë në veri dhe në komunat tjera me shumicë serbe, si në Graqanicë, në Shtërpcë, në Kllokot dhe në vendet tjera, do të futen në aksione sipas një plani serb të përgatitur dhe që udhëhiqet nga Beogradi.
“Aksione kriminale do të ketë në veri dhe në pjesët e ndryshme të Kosovës. Madje priten aksione shumë më të ashpra në anën tjetër të Lumit Ibër. Serbia me aksionet e veta do të atakon objekte dhe strukturën e shtetit edhe në Prishtinë, në Pejë, në Gjilan, në Ferizaj, në Mitrovicë dhe në vendet e ndryshme të Kosovës”, thekson Muhamet Kelmendi.
Sipas tij, pikësynimi është krijimi i një gjendje luftarake në mënyrë që të ikë NATO nga Kosova dhe të sulmohet Kosova nga Serbia për ta ripushtuar. Kjo mund të realizohet sipas Kelmendit,asi që tani më e kemi minoritetin serb të pa inkuadruar në organet e shtetit të Kosovës dhe për këtë shkak janë tërhequr policët, gjyqtarët, prokurorët e administrata serbe nga shteti.
“Mbi këtë bazë nuk morën pjesë në zgjedhje dhe tash po shihen aksionet terroriste në Republikë. Duke marrë parasysh këtë çështjeje kështu mbetet mobilizimi i forcave në Kosovë. FSK kërkohet të armatoset dhe të rritet në numër. Edhe Policia e Kosovës kërkohet të rritet në numër dhe të armatoset me armë adekuate të luftës. Tash për tash është NATO dhe nuk ka rrezik të agresionit serb. Mirëpo, kjo pritet në zhvillimet e ardhshme. Do të vijë koha kur Kosova do të ndeshet drejtpërdrejt me shtetin serb. Për këtë duhet të përgatitet shteti”, theksoi Kelmendi për “Kosova Times”.
Dardan Grapci: Të gjithë në mbrojtje të shtetit
Analisti politik Dardan Grapci paralajmëron se sulmet serbe kundër Kosovës mundë të përshkallëzohen akoma më shumë, ditët në vijim, prandaj kërkohet mobilizim i të gjitha forcave në vend, edhe i një pjese të popullatës së gatshme për luftë mbrojtëse kundër sulmeve që po përgatiten nga ana e Serbisë.
“Sipas te gjitha gjasave nga provokimet e Serbisë dhe këto sulme që është duke i bërë shteti serb në Veri të Mitrovicës, duke instrumentalizuar dhe aktivizuar bandat kriminale, mendoj që nuk do të shkon shumë gjatë dhe ka rrezik potencial që të shpërthen edhe një tjetër luftë mes Serbisë dhe Kosovës, luftë edhe më e keqe se ajo e viteve 98-99. Nëse me pyetni mua se a e dua unë luftën, ju them që – JO. Besoj dhe jam I sigurt që askush nga qytetarët e Kosovës nuk dëshiron të ketë një luftë të re me asnjë nga fqinjët që na rrethojnë, pra as me Serbinë, por nëse vazhdojnë bandit e organizuara serbe me këto sulme, atëherë duhet të ju kundërvihemi pa asnjë hezitim, duhet të mobilizohen të gjithë a forcat dhe qytetarët e aftë për ti shërbyer ushtrisë së shtetit të Kosovës, për mbrojtje, që vendi të çlirohet e të pastrohet nga bandit serbe, duke I ndjek e kallur bishtin deri përtej kufirit të shtetit tonë, duhet t’i ndjek deri në kufi të Serbisë, të sigurohet paqja dhe stabiliteti i shtetit të Kosovës”, theksoi Grapci për “Kosova Times”.
