Kryetari i Prishtinës, Përparim Rama, ka reaguar ashpër ndaj përpjekjeve të opozitës për të ndryshuar rregulloren që rregullon menaxhimin e mbeturinave në kryeqytet, duke theksuar se nuk do të lejojë që shërbimi jetik i pastrimit të sabotohet për arsye politike.
Ai siguroi qytetarët se punëtorët e kompanisë publike “Pastrimi” nuk do të mbeten pa punë dhe se grumbullimi i mbeturinave do të vazhdojë të garantohet. Për shkak të mungesës së kapaciteteve të mjaftueshme të kompanisë publike, Rama tha se që nga muaji maj është angazhuar një operator privat për të përmirësuar cilësinë e shërbimeve.
“Angazhimi i operatorit privat dhe furnizimi me kontenierë të rinj kanë përmirësuar dukshëm menaxhimin e mbeturinave. Ndërhyrjet opozitare që synojnë ndalimin e këtij bashkëpunimi do të rikthenin problemet e mëparshme, duke rrezikuar shëndetin publik dhe cilësinë e jetesës në kryeqytet,” theksoi Rama.
Kryetari shprehu keqardhje për politizimin e këtij shërbimi esencial, duke e quajtur penalizimin e qytetarëve për arsye politike si një akt johuman dhe të papranueshëm. Ai hodhi poshtë zërat se punëtorët e “Pastrimit” do të humbin vendet e punës, duke i quajtur këto si dezinformata që synojnë krijimin e frikës dhe panikut.
Rama konfirmoi se angazhimi i operatorit privat nuk është një zëvendësim për kompaninë “Pastrimi,” por një mbështetje që do të vazhdojë të sigurojë shërbime të standardit më të lartë për qytetarët. /Kosovatimes/
