POLICIA në qytetin kanadez të Vankuverit njoftoi se dy persona u goditën me thikë dhe i dyshuari u vra në një ndërhyrje të policisë. Siç shkruan BBC , ngjarja ka ndodhur mëngjesin e djeshëm, kur oficerët e policisë iu përgjigjën denoncimit të një burri të armatosur me thikë që vodhi alkool nga një restorant.
Dy personat e plagosur janë dërguar në spital, ndërsa lëndimet e tyre janë jashtë rrezikut për jetën. Policia ende nuk e ka identifikuar të dyshuarin e vdekur.
Policia e Vankuverit tha në një deklaratë se një telefonues “raportoi një burrë që kishte vjedhur alkool dhe ishte i armatosur me thikë” në një restorant pranë bibliotekës qendrore të qytetit. Kur oficerët mbërritën në vendngjarje, gjetën një të dyshuar të armatosur brenda një dyqani komoditeti aty pranë.
I dyshuari, identiteti i të cilit nuk bëhet i ditur, më pas u qëllua dhe u plagos rëndë. Policia dhe shërbimet e urgjencës kanë tentuar ta ndihmojnë, por ai ka ndërruar jetë në spital.
Një video e parë nga The Canadian Press thuhet se tregon oficerët duke qëlluar mbi banakun e dyqanit dhe duke bërtitur “lëvizni”, ndërsa drejtojnë armët e tyre. Një video tjetër tregon reaguesit e urgjencës duke kryer CPR mbi të dyshuarin.
