Gjykata Speciale në Hagë ka arrestuar sot ish-komandantin e Ushtrisë Çlirimtare të Kosovës, Isni Kilaj, ish-këshilltarin e Hashim Thaçit, Bashkim Smakaj dhe Fadil Fazliun, vëllain e heronjve Fahri e Bahri Fazliut.
Arrestimin e kanë konfirmuar familjarët e tyre, derisa Zyra e Prokurorit të Specializuar ende nuk ka dhënë ndonjë përgjigje lidhur me këto arrestime. Ndërkohë, ushtruesi i detyrës së kryetarit të OVL të UÇK-së, Faton Klinaku, ka thënë se Gjykata Speciale po vazhdon “gjahun ndaj UÇK-së dhe luftëtarëve të lirisë”.
“Gjykata Speciale po vazhdon gjahun ndaj UÇK-së dhe luftëtarëve të lirisë. Në media u dha lajmi për arrestimin e Isni Kilajt e Bashkim Smakajt, por sipas informatave që po më vijnë është arrestuar edhe Fadil Fazliu, vëllai i dëshmorëve Fahri e Bahri Fazliu”, ka shkruar Klinaku.
