Ish-deputeti i Lëvizjes Vetëvendosje (VV), Fitim Uka, ka njoftuar largimin e tij nga politika pas përfundimit të mandatit si deputet në Kuvendin e Republikës së Kosovës. Në një postim publik, ai falënderoi të gjithë ata që e mbështetën në këtë rrugëtim dhe kërkoi ndjesë për rastet kur nuk arriti t’i përfaqësonte denjësisht.
“Po ndahem nga politika, po ua liroj këtë rrugë dhe do të vazhdoj me pasionin tim të kahershëm dhe të përhershëm, psikologjinë, si dhe me obligimin më kuptimplotë, që është mësimdhënia,” shkroi Uka.
Ai theksoi se largimi nga politika është një moment reflektimi për përvojat dhe mësimet e nxjerra gjatë kësaj kohe.
Duke e mbyllur mesazhin, Uka la një shprehje të veçantë: “Përgjigjet më të mira i marrin pyetjet që nuk shtrohen.”
Ky largim shënon fundin e angazhimit të tij politik dhe kthimin e plotë drejt karrierës së tij në psikologji dhe arsim. /Kosovatimes/
