Gjatë paraqitjes së tij të parë në Hagë, Fadil Fazliu u deklarua i pafajshëm ndaj akuzave të ngritura nga Dhomat e Specializuara të Kosovës. Ai tha se ka biseduar me avokatin tij mbrojtës dhe ka mohuar akuzat e ngritura ndaj tij.
“Kam biseduar me avokatin tim mbrojtës dhe deklarohem i pafajshëm”, tha Fadil Fazliu, në seancën gjyqësore në Hagë.
Ndërkaq avokati mbrojtës, Michel Pestman, ka kërkuar lirimin e Fadil Fazliut me garanci financiare, në shumën 2500 euro.
Duke folur për rrethanat e arrestimit dhe për gjendjen ekonomike të klientit të tij, avokati mbrojtës kërkoi që të lirohet me kusht, meqë, sikundër tha ai, nuk ka parë asnjë provë që të mbështet aktakuza ndaj klientit të tij, Fadil Fazliu.
“Nuk ka prova dhe as dëshmitarë dhe do të ishte e pamundur që të pengojë dikë në procesin gjyqësorë”, tha avokati mbrojtës, Pestman, teksa shtoi së klienti i tij është peshk i vogël në këtë drejtim.
Bashkë me ish-presidentin Hashim Thaçi, Ismail Smakaj, Isin Kilaj dhe Hajredin Kuqi, Fadli Fazliu akuzohet për veprat penale për përpjekjen për të penguar personat zyrtarë në kryerjen e detyrave të tyre zyrtare, si dhe pikën tjetër për mosbindje ndaj gjykatës.
