Kryeministri i Maqedonisë së Veriut, Hristian Mickovski deklaroi sot në një konferencë për medie se nuk do të ndodh asgjë më 11 dhjetor, ditën kur Gjykata Kushtetuese do të vlerësojë kushtetutshmërinë e ligjit për gjuhët.
Mickovski tha se opozita dëshiron tensione dhe ndarje etnike.
“Të mërkurën nuk do të ndodhë asgjë. Kemi një situatë ku tani askush nuk mund të ndërhyjë në Gjykatën Kushtetuese. Tema e vetme, përmes së cilës BDI është e pranishme në publik është krijimi i ndasive mbi baza etnike”, tha Mickovski.
Ndaj deklaratës së Mickovskit, ka reaguar BDI, duke thënë që “kryeministri ka kërcënuar sërish publikisht aktivitetin politik të partive politike, duke keqpërdorur institucionet shtetërore për të shtypur zërat politikë dhe etnikë të pakënaqësisë.”
Duke komentuar zhvillimet e fundit, kryetari i Aleancës për Shqiptarët, Ziadin Sela deklaroi se ” në rrezik është i gjithë ligji për gjuhët e jo vetëm tre nene të tij.
“Një apel Qeverisë, Hristijan Mickoskit, është mëse e vërtetë që s’është në pyetje Gjykata Kushtetuese, por është iniciativa juaj për tu prek te gjuha shqipe. Thirni mëndjes dhe mos e prekni gjuhën shqipe”, tha Sela.
Zëvendëskryeministri Izet Mexhiti, përmes një postimi në ‘Facebook’ ka deklaruar se gjuha shqipe nuk është cenuar, por se cenohet pasuria e paligjshme e, siç thotë, “klikës korruptive të BDI-së e fituar në kurriz të shqiptarëve.”
“Gjuha shqipe nuk do të kontestohet, milionat e oligarkëve të BDI-së, po!”ka shkruar Mexhiti.
