Kryetari i Partisë Demokratike të Kosovës Memli Krasniqi është takuar me raportuesin e sapoemëruar për Kosovën në Parlamentin Evropian, Riho Terras, ku kanë diskutuar mbi thellimin e bashkëpunimit mes Kosovës dhe BE-së, si dhe për vizionin e përbashkët për të ardhmen evropiane të Kosovës.
Në këtë takim Krasniqi po ashtu ka theksuar përkushtimin e palëkundur të Partisë Demokratike të Kosovës për të avancuar integrimin e Kosovës në BE, një mision që mbetet në thelb të agjendës së tyre politike.
“Nga raportuesi Terras kërkova që të avokoj për heqjen e masave ndëshkuese të BE-së ndaj shtetit tonë, pasojat e të cilave po i vuajnë qytetarët tanë”, ka thënë ai përmes një postimi në Facebook.
Ai tutje ka thënë se ka nënvizuar nevojën urgjente që Bashkimi Evropian të reagojë ndaj sulmeve të vazhdueshme të Serbisë ndaj Kosovës dhe sovranitetit të saj.
Sipas tij provokimet e vazhdueshme nuk duhet të kalojnë pa përgjigje, pasi rrezikojnë stabilitetin në rajon dhe minojnë përpjekjet për një të ardhme më paqësore dhe më të mirë.
“Raportuesin Terras e falënderova për përkushtimin e tij në këtë rol të rëndësishëm dhe pres me padurim bashkëpunimin tonë të mëtejshëm”, ka shkruar Krasniqi. /Kosovatimes/
