Një grup sirian i mbrojtjes civile i njohur si Helmetat e Bardha po heton raportet se njerëzit ende mbahen në qelitë e fshehura nëntokësore në burgun Sednaya.
Në Platformën X, Helmetat e Bardha njoftuan se kishin dërguar pesë “skuadra të specializuara të reagimit emergjent” në burg me ndihmën e një udhërrëfyesi të njohur me orarin e tij.
Sednaya është një nga burgjet e çliruara pasi rebelët morën kontrollin e vendit.
Autoritetet lokale në provincën e Damaskut raportuan se po vazhdonin përpjekjet për të liruar të burgosurit, disa prej të cilëve ishin “gati mbytur” për shkak të mungesës së ventilimit. Ata u bënë thirrje ish-ushtarëve dhe punonjësve të burgjeve nga regjimi i Asadit që t’u japin forcave rebele kodet për dyert elektronike nëntokësore, të cilat deri më tani nuk kanë arritur t’i hapin. Ata deklarojnë se në këtë mënyrë ata mund të lironin “më shumë se 100,000 të arrestuar që shihen në video”, raporton BBC.
Gjithashtu u ndalua edhe një fëmijë i vogël me nënën e tij
Një video, e publikuar edhe nga Al Jazeera, po qarkullon në rrjetet sociale, duke treguar përpjekjet për të hyrë në pjesët e poshtme të burgut. Videoja tregon një burrë duke përdorur një shtyllë metalike për të thyer një mur dhe zbulon një hapësirë të errët pas tij.
Pamjet e tjera tregojnë lirimin e të burgosurve, përfshirë një fëmijë të vogël që u ndalua me nënën e tij. Fëmija mund të shihet në videon e lirimit të grave, të lëshuar nga Shoqata Turke e të Paraburgosurve dhe Personave të Zhdukur në Burgun Sednaya (ADMSP).
“Ai ka rënë. Mos kini frikë,” dëgjohet një zë në regjistrim duke u përpjekur t’i qetësojë gratë se tani janë të sigurta.
Videoja e konfirmuar nga AFP tregon sirianët që nxitojnë drejt burgut me shpresën për të gjetur të afërmit e tyre mes të liruarve. Sednaya u bë një simbol i formave më të këqija të abuzimit nën regjimin e Asadit, ku mijëra mbështetës të opozitës u torturuan dhe u ekzekutuan.
Qindra mijëra të burgosur në kampe
Gjatë luftës civile, e cila filloi në vitin 2011, forcat qeveritare mbajtën qindra mijëra njerëz në kampe, ku tortura ishte praktikë e zakonshme, sipas raporteve të grupeve të të drejtave të njeriut.
Të shtunën, Hayat Tahrir al-Sham (HTS) njoftoi se ata kishin liruar më shumë se 3,500 të burgosur nga një burg ushtarak në Homs ndërsa morën kontrollin e qytetit. Disa orë më vonë, HTS deklaroi “fundin e epokës së tiranisë në burgun Sednaya” duke hyrë në kryeqytet, i cili është bërë sinonim i abuzimeve më të errëta të Asadit.
Në një raport të vitit 2022, ADMSP deklaroi se Sednaya “praktikisht u bë një kamp vdekjeje” pas fillimit të luftës civile. Vlerësohet se më shumë se 30,000 të burgosur u ekzekutuan ose vdiqën për shkak të torturave, mungesës së kujdesit mjekësor dhe urisë midis 2011 dhe 2018. Sipas deklaratave të të burgosurve të liruar, të paktën 500 persona të tjerë u ekzekutuan midis 2018 dhe 2021.
Amnesty International e përshkroi Sednaya-n në vitin 2017 si një “thërtore njerëzore”, duke vënë në dukje se ekzekutimet u miratuan në nivelet më të larta të qeverisë së Asadit. Qeveria më pas i hodhi poshtë pretendimet si “të pabaza” dhe “të pa vërteta”, duke deklaruar se të gjitha ekzekutimet ndoqën një proces të rregullt ligjor.
