Ish-ministri i Jashtëm, nënkryetari aktual i Kuvendit të Kosovës, Enver Hoxhaj ka komentuar situatën pas rënies së regjimit të Bashar al-Assadit, ku sipas tij, Kosovës i hapet një mundësi e re për të tejkaluar kundërshtimin ndaj pavarësisë së saj.
Hoxhaj thotë se vendet si Siria, Libani dhe Iraku, po dalin nga orbita e ndikimit iranian, falë politikës së mençur, sipas tij, të Turqisë dhe Izraelit.
Por, sipas ish-kryediplomatit, Qeveria e Kosovës nuk ka ende qëndrim për këto zhvillime dhe se si t’i përdorë ato për njohjen e mëtejshme të Kosovës.
“Sot, Lindja e Mesme po kalon një nga momentet më të rëndësishme në dekada. Me rënien e regjimit të Bashar al-Assadit, Kosovës i hapet një mundësi e re për të tejkaluar kundërshtimin e Iranit ndaj pavarësisë së saj, në vende si Siria, Libani dhe Iraku, të cilat po dalin nga orbita e ndikimit iranian, falë politikës së mençur të Turqisë dhe Izraelit. Sot, qeveria e Kosovës nuk ka ende qëndrim për këto zhvillime dhe se si t’i përdorë ato për njohjen e mëtejshme të Kosovës. Kosova duhet të jetë ndër vendet e para që njohin qeverinë e përkohshme të Sirisë, një vend ku Serbia ishte aleate e regjimit brutal të Assadit, dhe të kthejë këtë moment në favor të njohjes së Kosovës nga Libani dhe Iraku. Diplomacia e Kosovës duhet të dalë nga moratoriumi i vetë-imponuar ndaj njohjes ndërkombëtare të shtetësisë së Kosovës”, ka shkruar Hoxhaj. /Kosovatimes/
