Shkruan: Arbër Zaimi
Sanksionet amerikane për korrupsion prekin një numër njerëzish të korruptuar, por jo gjithë të korruptuarit e botës. Psh. në sanksionet e sotme ishte dënuar edhe një kenian me origjinë indiane, me emrin Kamlesh.
Ai me siguri nuk është dënuar si i vetmi i korruptuar në Kenia a në Indi, e as nuk është dënuar pse i ka këmbët me lesh.
Dënimet kanë edhe kuptim gjeopolitik. Në rastin e zotërinjve Grubi e Bexheti në Maqedoninë e Veriut është bërë e qartë tek vendimi amerikan kundër tyre se ata kanë dashur t’i ndihmojnë një personazhi proserb e prorus, të famshëm për shovinizmin antishqiptar, me emër Sasho Mijallkov. Mijallkovi, familjar i Gruevskit dhe ish-kryetar i shërbimeve sekrete në MV, njihet si faktor në shërbim të Beogradit dhe Moskës. Pse duhet dy politikanë shqiptarë të Maqedonisë t’i ndihmojnë Mijallkovit? Është thënë edhe se Mijallkovi ka qenë personi që ngriti kurthin e Kumanovës në 2015, kurth ku ranë pabesisht disa shqiptarë patriotë që besuan se po çlirojnë bashkatdhetarët e tyre, por që disa u vranë e disa janë ende në burg.
Tash, kush ka qejf të dijë më shumë për këto punë, dhe nuk mjaftohet me leximin e komunikatës nga SHBA, le të interesohet pak për kompanitë biznesore të Mijallkovit në Çeki, për bashkëpunimin e tij të ngushtë me Millorad Mishkoviqin, i cili në vitet ‘90 ishte ministër i Kontiqit e I Bullatoviqit, në kohën e Millosheviqit e sot është drejtor i sipërmarrjes “Beograd na Vodu”, një investim gjigand e i dyshimtë ndërtimor në atë qytet. Rrjeti ballkanik i investimeve ku Mishkoviqi është faktor i rëndësishëm, ka prodhuar modele të ngjashme jo vetëm në Serbi, po edhe në vende të tjera të Ballkanit Perëndimor. Kryesisht ky model nënkupton pastrimin e parasë të pistë me origjinë bandat kriminale, përmes investimeve në ndërtime apartamentesh e hotelesh luksoze , qendra tregtare dhe import – por gjithmonë kundër prodhimit vendor si aktivitet që merr kohë e nuk lë hapësirë të madhe për shpëlarje parash. Rrjeti i tyre përfshin biznesmenë të mëdhenj të këtyre fushave, të cilët shpesh janë pronarë apo sponsorë edhe të disa mediave e të disa bankave në po këto vende. Të gjitha këto asete shumë të përdorshme për synimet e luftës hibride ruse.
Mos duket si naive pyetja se pse disa shqiptarë të caktuar, brenda a jashtë listave të zeza, ndihmojnë njerëz të tillë?
