Posta e Kosovës, ka lëshuar në qarkullim emisionin e ri të pullave postare “Objektet fetare: Xhamia e Sinan Pashës dhe Manastiri i Graçanicës”.
“Ndërtesat fetare janë pjesë e rëndësishme e trashëgimisë kulturore dhe historike. Xhamia e Sinan Pashës dhe Manastiri i Graçanicës janë dy monumente që dallohen për historinë, arkitekturën dhe rëndësinë e tyre fetare e kulturore. Xhamia e Sinan Pashës dhe Manastiri i Graçanicës përfaqësojnë diversitetin fetar e kulturor të Kosovës. Ato janë dëshmi e pasurisë kulturore dhe arkitektonike që duhet njohur dhe ruajtur për brezat e ardhshëm”, thuhet në njoftimin e postës.
Xhamia e Sinan Pashës, ndërtuar në vitin 1615 në Prizren, është një nga ndërtesat më të rëndësishme të arkitekturës islame në Kosovë. Përveç arkitekturës specifike, kjo xhami dallohet edhe për pikturat murale të punuara në dy periudha të ndryshme, që prezantojnë në mënyrë të veçantë artin islam të periudhës klasike dhe atë të barokut, të gërshetuar me frymën vendore të prezantimit artistik të zbukurimeve.
Manastiri i Graçanicës, i ndërtuar në shekullin e XIV-të afër Prishtinës mbi themelet e një kishe të mëhershme, përfaqëson një shembull të shkëlqyer të arkitekturës mesjetare, ku reflektohet stili Bizantin me ndikime nga arti perëndimor. I përfshirë në listën trashëgimisë botërore të UNESCO-s, Manastiri i Graçanicës ka rëndësi të veçantë për vendin, veçanërisht për komunitetin ortodoks dhe mbarë botën, duke ruajtur traditat fetare dhe kulturore.
