Presidenti i Serbisë, Aleksandar Vuçiq, ka thënë se do t’i publikojë më 12 dhjetor të gjitha dokumentet lidhur me rindërtimin e stacionit hekurudhor në Novi Sad, pas aksidentit vdekjeprurës në nëntor.
Derisa Vuçiq mbajti një fjalim në lidhje edhe me këtë çështje të mërkurën mbrëma në zyrën e tij në Beograd, disa qindra studentë dhe qytetarët u mblodhën para ndërtesës së Presidencës serbe duke brohoritur kundër tij.
Presidenti serb tha se do t’i publikojë 195 dokumente në lidhje me punën ndërtimore në stacionin ku shembja e një strehe la të vdekur 15 njerez më 1 nëntor.
Në lidhje me kërkesat e studentëve protestues, të cilët kanë bllokuar punën e disa fakulteteve shtetërore, Vuçiq tha se të gjithë studentët e ndaluar janë “liruar”.
“Nëse dënohen për trazira, do të marr vendim për t’i falur”, tha Vuçiq.
Ai theksoi se i ka kërkuar kryetares së Kuvendit të Serbisë, Ana Bërnabiq, që në rend dite të vendoset seanca për ndërrimin e Qeverisë në Kuvend.
Vuçiq theksoi gjithashtu se një monument për viktimat do të ngrihet në vendin e aksidentit në stacionin hekurudhor në Novi Sad.
Duke folur për protestën para ndërtesës së Presidencës, Vuçiq tha se jashtë po mbahen “demonstrata politike”, të cilat po ndodhin pavarësisht se ai po u jep atyre “lajme të mira”.
Ai po ashtu tha se pret që studentët të kthehen në mësime pasi, sipas tij, kërkesat e tyre janë plotësuar.
Vuçiq pretendoi se në katër vjetët e fundit janë investuar 426 milionë euro në “grupet e presionit”, të cilët, sipas tij, duan të “ndryshojnë Serbinë dhe të rrëzojnë qeverinë”.
Protesta para Presidencës serbe
Disa qindra qytetarë dhe aktivistë u mblodhën para ndërtesës së Presidencës serbe në Beograd më 11 dhjetor, gjatë fjalimit të paralajmëruar Vuçiqit në atë ndërtesë.
Aktivistët e organizatës informale studentore “Borba” njoftuan për këtë tubim në rrjetin social Instagram, me mesazhin: “Presidenti flet në lidhje me bllokadat studentore, ejani para Presidencës që zëri ynë të dëgjohet”.
Dhjetëra fakultete shtetërore në Serbi janë bllokuar pas sulmeve ndaj studentëve gjatë protestave në lidhje me aksidentin vdekjeprurës në stacionin hekurudhor në Novi Sad.
Studentët që kanë bllokuar katër universitete shtetërore – atë të Beogradit, Novi Sadit, Nishit dhe Kragujevcit – kërkojnë, ndër të tjera, publikimin e dokumentacionit të fshehtë për rindërtimin e Stacionit Hekurudhor në Novi Sad.
Ata gjithashtu kërkojnë hedhjen poshtë të akuzave kundër studentëve të arrestuar dhe ndaluar gjatë protestave që pasuan aksidentin.
Aksidenti ndodhi vetëm disa muaj pas hapjes solemne të stacionit pas një rindërtimi trevjeçar.
Përfaqësuesit e pushtetit i dënojnë protestat dhe bllokadat.
Protesta dhe bllokimi i rrugëve janë mbajtur pothuajse çdo ditë që nga shembja e strehës më 1 nëntor, duke kërkuar përgjegjësi pasi betoni i strehës ranë mbi njerëz që ishin ulur ose po kalonin nën të, në një ditë me diell.
Ndërtesa e stacionit hekurudhor ishte rinovuar dy herë vitet e fundit. Shumë njerëz në Serbi besojnë se korrupsioni i përhapur dhe marrëveshjet e fshehta ndikuan në rinovim të dobët dhe shembje të strehës.
Stacioni në Novi Sad u ndërtua fillimisht në vitin 1964. Rinovimi i tij ishte pjesë e një projekti më të madh me Kinën dhe Hungarinë për ta ndërtuar një hekurudhë të shpejtë midis Beogradit dhe Budapestit.
