Deri mbrëmë në Komisionin Qendror të Zgjedhjeve janë aprovuar mbi 33 mijë kërkesa për t’u regjistruar si votues jashtë Kosovës, teksa periudha e aplikimit për regjistrim do të vazhdojë deri më 26 dhjetor 2024, raporton Gazeta Sinjali.
Këtë e ka bërë të ditur zëdhënësi i KQZ-së, Valmir Elezi.
“Në bazë të të dhënave, deri më 12 dhjetor, në orën 21:30, pas aplikimit përmes platformës elektronike (http://diaspora.kqz-ks.org) janë aprovuar 33,635 kërkesa për regjistrim, ndërsa 2,100 janë refuzuar. Në shumicën e rasteve të refuzuara, aplikuesit nuk janë fotografuar duke mbajtur njëkohësisht në dorë dokumentin e identifikimit. KQZ i informon individualisht aplikuesit e refuzuar për arsye të refuzimit të kërkesës së tyre dhe gjithashtu aplikuesit e refuzuar njoftohen se mund të ri-aplikojnë për regjistrim dhe të bashkëngjisin dokumentet e nevojshme për të përmbushur kërkesën e tyre në përputhje me udhëzimet e KQZ-së”.
Ai ka thënë se nga 33,635 aplikime të aprovuara, 8,655 shtetas të Kosovës janë regjistruar për të votuar fizikisht në përfaqësi diplomatike 5,330 janë regjistruar për të dërguar pakon me fletëvotim në kutinë postare të KQZ-në në Kosovë dhe 19,650 janë regjistruar për të dërguar pakon me fletëvotim në kutinë postare jashtë Kosovës.
