Shefja e Grupit Parlamentar të Lëvizjes Vetëvendosje, Mimoza Kuari-Lila, në një konferencë për medie, ka reaguar ndaj Partisë Demokratike të Kosovës, e cila ka dërguar 16 ligje në Gjykatën Kushtetuese. Ajo tha se u pa qartazi se PDK është pozicionuar kundër interesave të qytetarëve të vendit dhe interesit publik.
Kusari-Lila tha se PDK është duke përdorur Gjykatën Kushtetuese për interesa personale dhe grupore.
“Atë çfarë kanë përvetësuar kundërligjshëm kur kanë qenë në pushtet duan ta mbrojnë me mekanizma ligjor, tash nga opozita”, tha Kusari-Lila.
Ajo, tutje, tha se PDK ka vepruar njëjtë, sikurse kanë qenë në opozita qeveritare. Sipas saj, edhe tani po ruhet një interes i një figure a një grupimi brenda këtij subjekti politik.
Kujtojmë se Partia Demokratike e Kosovës i ka proceduar në Gjykatën Kushtetuese ligjet e miratuara në Kuvendin e Kosovës, në seancën e 5 dhjetorit.
Shefi i Grupit Parlamentar të PDK-së, Abelard Tahiri, pasi e ka dorëzuar lëndën në gjykatë, tha se nga 16 ligjet e kontestuara, 15 ligje janë kontestuar për shkelje procedurale, ndërsa Ligji për Byronë Shtetërore për Verifikimin dhe Konfiskimin e Pasurisë së Pajustifikueshme, është kontestuar si në procedurë, ashtu edhe në përmbajtje.
