Koordinatorja e Konventës Kombëtare për BE-në në Serbi, Bojana Sellakoviq, ka deklaruar për RTK se Serbia po stagnon në procesin e integrimeve evropiane, duke theksuar se asnjë kapitull i ri nuk është hapur në tri vitet e fundit. Ajo nënvizoi se marrëdhëniet me Kosovën, presionet gjeopolitike dhe përparimi në zbatimin e reformave të brendshme do të jenë faktorët kyç për përshpejtimin e këtij procesi.
Sellakoviq theksoi se përparimi në marrëdhëniet me Kosovën mbetet qenësor për stabilitetin e rajonit dhe për procesin e përgjithshëm të anëtarësimit të Serbisë në Bashkimin Evropian. Sipas saj, BE-ja pret që Serbia të përmbushë detyrimet nga marrëveshjet e mëparshme.
“Marrëdhënia midis Serbisë dhe Kosovës mbetet çështje kyçe për Bashkimin Evropian, pasi konsiderohet si baza për sigurinë dhe stabilitetin e rajonit. Raportet e BE-së për Serbinë nuk përmbajnë kushte të reja, por theksojnë nevojën për zbatimin e obligimeve ekzistuese të përcaktuara nga Marrëveshjet e Brukselit dhe Ohrit,” deklaroi Sellakoviq.
Ajo rikujtoi se implementimi i detyrimeve nga Kapitulli 35, që lidhen me dialogun me Kosovën, është thelbësor për Serbinë, duke qenë obligim formal juridik.
Në lidhje me çështjen e Banjskës, Sellakoviq theksoi se ky nuk është një detyrim i ri, por një pjesë e dialogut ekzistues.
“Obligimet për Banjskën janë të përfshira tashmë në dialog, kështu që nuk kemi të bëjmë me një kusht të ri. Por, mesazhet e marra deri tani ishin të qarta – Serbia pritet të tregojë vullnet të mirë për të përmbushur detyrimet e saj. Megjithatë, kjo çështje nuk dominon më diskursin politik vendas”, sqaroi ajo.
Sipas Sellakoviq, Serbia po përballet me ngecje në procesin e integrimeve evropiane, dhe si pengesë kryesore për përparimin e mëtejshëm ajo përmendi faktorët gjeopolitikë, të cilët kanë marrë rëndësi të madhe që nga fillimi i luftës në Ukrainë.
“Gjatë dy viteve e gjysmë të fundit është bërë e qartë se dimensioni gjeopolitik ka marrë një peshë të madhe për Bashkimin Evropian dhe vendet anëtare që vendosin për përparimin e Serbisë. Para fillimit të luftës në Ukrainë, marrëdhëniet me Kosovën ishin çështja kryesore politike. Tani, ato janë komplikuar më tej nga marrëdhëniet e Serbisë me Rusinë. Pritet që presioni gjeopolitik ndaj Serbisë të vazhdojë të rritet”, tha Sellakoviq.
Ajo theksoi se ky presion duhet ta shtyjë Serbinë të harmonizohet sa më shpejt me vlerat e BE-së dhe të përmbushë më shpejt detyrimet që lidhen me përafrimin teknik me standardet e BE-së.
Në përfundim, Sellakoviq vlerësoi se Serbia po përballet me sfida të mëdha në rrugën drejt anëtarësimit në BE.
“Gati tre vite nuk është hapur asnjë kapitull i ri, ndërsa ritmi i reformave në të gjitha fushat është shumë i ngadalshëm, duke mos mjaftuar për një përparim domethënës”, tha ajo.
