Plani zhvillimor komunal konsiderohet njëri nga dokumentet më të rëndësishme në kryeqytet. Opozita nuk po e përkrah këtë plan, ndërsa nga Komuna e konsiderojnë të domosdoshëm kalimin e tij diskutim publik. Ky propozim ishte në rend dite në seancën e 9 dhjetorit, por nuk arriti të trajtohej, pasi seanca u ndërpre në mungesë kuorumi.
Plani Zhvillimor Komunal konsiderohet si njëri nga dokumentet më të rëndësishme të kryeqytetit. Nga Vetëvendosje në Prishtinë thonë se nuk e përkrahin një plan të tillë. Edhe në deklarime të mëhershme nga kjo parti, ky plan është konsideruar i paligjshëm dhe në dëm të interesit publik.
“Ne jemi të interesuar për një PZHK, që e zhvillon kryeqytetin e zhvillon të gjitha lagjet pa përjashtim”, tha Besart Krasniqi, asamblist i VV-së në Prishtinë.
Ky plan po kundërshtohet edhe nga Partia Demokratike e Kosovës në Prishtinë.
“PZHK, do të duhej të ishte tërësisht në suaza të respektimit të procedurave edhe ligjeve gjatë hartimit e më pastaj edhe gjatë zhvillimit të diskutimeve me qytetarë e përfshirjen e tërë qytetit, në diskutim për një plan të rëndësishëm dhe kjo nuk është bërë në fillim nga kryetari Rama”, tha Leutrim Retkoceri, shef i asamblistëve të PDK-së në Prishtinë.
Por, nga Komuna e Prishtinës po e konsiderojnë të domosdoshme kalimin e tij në diskutim publik, në mënyrë që të vazhdohet me procedura tjera.
”Po presim që gjatë këtij muaj eventualisht pas festave, në një seancë të radhës të vendosim se rend të ditës dhe fillimisht të vendoset në dëgjim publik e pastaj të tentojmë që ta kalojmë, sepse është një prej projekteve kryesore pa të cilin nuk mund të shkohet tutje”, tha Donat Lushaku, zëdhënës i komunës së Prishtinës.
Propozim vendimi për lënie në shqyrtim publik të projekt-dokumentit të planit zhvillimor komunal 2024-2032, ishte në rend dite në seancën e 9 dhjetorit të Kuvendit Komunal, por nuk arriti të trajtohej, pasi seanca u ndërpre në mungesë kuorumi.
