Radio-dokumentar “Njomëza e UÇK- së”, kushtuar dëshmores më të re të UÇK -së Njomëza Lipa, vjen i realizuar nga gazetarja e RTK-Radios, Sabrie Haxhiu.
Njomëza Lipa, ishte vetëm 14 vjeçe, por aq e pjekur dhe e vendosur në rrugën e lirisë, aq sa me trimërinë e saj e bënë historinë reale si një rrëfim legjende.
Mësoni më shumë në këtë radio-dokumentar rreth historisë së vajzës filloriste, ushtare e UÇK- së; një histori që tregohet për herë të parë, e që rëndon mbi ndërgjegjen e shoqërisë kosovare.
Njomëza , kjo heroinë e heshtur, ishte vetëm 14-vjeçe kur iu bashkua radhëve të UÇK-së në Brigadën 133 “Adrian Krasniqi” të Zonës Operative të Dukagjinit.
Në luftërat e shumta nëpër botë ndodh që fëmijët të rekrutohen me forcë. Por kjo nuk ndodhi në luftën e UÇK-së. Shumë fëmijë shqiptarë të Kosovës iu bashkuan fronteve të luftës dhe treguan guxim si të ishin luftëtarë të rritur. Disa prej tyre edhe ranë heroikisht në beteja të përgjakshme.
Njomëza Lipa edhe pse fëmijë mbi supet e saj po e ndjente peshën e momentit historik. Me çdo kusht donte t’i bashkohej UÇK-së, pavarësisht se mosha nuk ia lejonte.
Historiani, Skënder Zhitia, teksa flet për shembullin e dëshmores Njomëza Lipa dhe të shumë vajzave e djemve të rinj që iu bashkuan luftës çlirimtare. Thotë se UÇK-ja kishte kritere sa i përket përfshirjes së vullnetarëve që nuk e kishin mbushur moshën, megjithatë jashtë këtyre kritereve në shumë raste ka dominuar vullneti i tyre i pathyeshëm.
Të premten, me 20 dhjetor, në orën 15:00, në Programin e Parë të Radio Kosovës, mund të dëgjoni më gjerësisht rreth historisë së dëshmores dhe masakrën e Studenicës së Istogut, ku ajo u gjet e vrarë bashkë me shoqet e saj Qëndresën, Mirdonën, Lindihanën, gratë e Lipajve, dhe të zotin e shtëpisë ku ndodhi masakra Salih Sokol Zeqirin.
