Qeveria e Kosovës ka vendosur të ndajë nga 100 euro shtesë të njëhershme për pensionistët dhe po ashtu nga 100 euro shtesë për gjithë fëmijët të moshave nga 0 deri 16 vjet.
Kryeministri i Kosovës, Albin Kurti, në një konferencë për media së bashku me ministrin e Financave, Hekuran Murati, ka thënë se po ndahen këto shtesa pas performancës së mirë ekonomike.
“Sot është dita më e shkurtër e vitit, pikërisht sot do ta bëjmë zgjatjen e dorës së shtetit”, ka thënë Kurti.
“Të dashur fëmijë, të gjithë ju që jeni të moshës nga 0 deri në 16 vjeç, dhe që jeni pranues të shtesave mujore për fëmijë, do t’i përfitoni edhe sivjet nga 100 euro secili. Kjo nuk është vetëm një dhuratë e fundvitit nga shteti juaj, por është investim në mirëqenien e të gjithë fëmijëve pa dallim. Andaj, edhe ju të dashur prindër, t’i rrisni fëmijët me shëndet por edhe me dashurinë për shtetin e tyre, kur vlerat dhe dashuria për vendin brumosen që në fëmijëri, e ardhmja e Republikës sonë pa dyshim që do të jetë në duar të sigurta”, ka theksuar Kurti. Ai ka thënë se në gusht prezantuan skemën e ridizajnuar të shtesave për fëmijë.
Kryeministri ka thënë se 100 euro shtesë do të marrin edhe pensionistët.
“Sikurse e kemi bërë traditë që sa herë që ka buxhet të mjaftueshëm, po ndajmë mbështetje shtesë në fund të viti nga 100 euro edhe për të gjithë pensionmarrësit”, ka thënë Kurti.
“Të dashur fëmijë, të gjithë ju që jeni të moshës nga 0 deri në 16 vjeç, dhe që jeni pranues të shtesave mujore për fëmijë, do t’i përfitoni edhe sivjet nga 100 euro secili. Kjo nuk është vetëm një dhuratë e fundvitit nga shteti juaj, por është investim në mirëqenien e të gjithë fëmijëve pa dallim. Andaj, edhe ju të dashur prindër, t’i rrisni fëmijët me shëndet por edhe me dashurinë për shtetin e tyre, kur vlerat dhe dashuria për vendin brumosen që në fëmijëri, e ardhmja e Republikës sonë pa dyshim që do të jetë në duar të sigurta”, ka theksuar Kurti.
“Sikurse tashmë e kemi bërë traditë që sa herë që ka buxhet të mjaftueshëm dhe ekonomia rritet përtej projeksioneve, në fund të vitit po ndajmë mbështetje shtesë të njëhershme nga 100 euro, apo siç disa edhe kanë filluar ta quajnë pensionin e 13-të për të gjithë pensionmarrësit të cilët kualifikohen. Kjo shënon mbështetjen e 5-të brenda mandatit tonë që një mbështetje e tillë shpërndahet te pensionistët tanë. Fillimisht e kishim bërë në fillim të vitit 2021, pastaj në prill dhe në dhjetor të vitit 2022, edhe në fund të vitit 2023, dhe tash po e vazhdojmë edhe në vitin 2024, sepse fatmirësisht kemi pasur performancë të shkëlqyer ekonomike dhe rritje të të hyrave buxhetore. Pra, përveç rritjes së pensioneve, fillimisht atyre bazike në vitin 2022, dhe pastaj të të gjitha kategorive edhe me 20% sivjet, gjatë mandatit tonë si me asnjë qeveri tjetër secili pensionist ka përfituar edhe 500 euro të tjera si mbështetje shtesë për ta lehtësuar barrën. Andaj, edhe në këtë fundvit sipas tashmë traditës tonë nga 100 euro për fëmjët dhe pensionmarrësit”, ka deklaruar ai.
Ai tha se rritjen ekonomike e të hyrat buxhetore qeveria i ndan me të gjithë, e sidomos me ata që kanë nevojë të ndjenë dorën e shtetit.
Kurse, ministri Murati ka theksuar do të mundohen t’i ekzekutojnë javën e ardhshme mjetet.
“Sikurse vitin e kaluar s’ka nevojë për ndonjë aplikim. I kemi listat e përfituesve në data bazat tona, si për pensionistë ashtu edhe për marrësit e shtesave për fëmijë. Do të mundohemi gjatë kësaj jave që të bëjmë përgatitjet teknike që të ekzekutohen pagesat për këtë javë”, ka deklaruar Murati.
