Komisioni i Pavarur i Mediave (KPM), në përputhje me obligimet ligjore të përcaktuara nga Ligji Nr. 08/L-228 për Zgjedhjet e Përgjithshme në Republikën e Kosovës, ka miratuar Rregulloren KPM-2024/03. Kjo rregullore përcakton obligimet e ofruesve të shërbimeve mediale gjatë fushatës zgjedhore, duke siguruar mbikëqyrjen dhe përputhshmërinë me ligjet dhe aktet nënligjore të KPM-së.
Për të ndihmuar të licencuarit në zbatimin e Kreut VIII të Ligjit për Zgjedhjet, KPM ka publikuar një Letër Sqaruese, ku ofron udhëzime specifike për zbatimin e Rregullores KPM-2024/03 nga ofruesit e shërbimeve mediale audiovizuale.
Në njoftimin e saj, KPM rikujton se gjatë periudhës së fushatës dhe heshtjes zgjedhore, të gjitha OSHM-të (televizionet dhe radiot) që vendosin të mbulojnë fushatën, duhet të deklarohen pranë KPM-së jo më vonë se shtatë (7) ditë para fillimit të fushatës zgjedhore, siç parashikohet në nenin 6.2 të Rregullores.
Po ashtu, sipas rregullave, të licencuarit janë të obliguar të dorëzojnë ditarët për zgjedhje, të cilët ndahen në:
Ditari A për terminet pa pagesë;
Ditari B për terminet me pagesë.
Këto ditarë, të plotësuar dhe të përfshirë me çmimoren përkatëse, duhet të dorëzohen një javë para fillimit të periudhës zgjedhore.
KPM mbetet në dispozicion të ofruesve të shërbimeve mediale për çdo sqarim shtesë, duke siguruar një proces transparent dhe në përputhje me ligjin gjatë zgjedhjeve parlamentare. /Kosovatimes/
