Njëzet e katër orë nga marrja në pyetje për pesë orë e kryebashkiakut të Tiranës Erion Veliaj, nga prokurorët e Strukturës së Posaçme Antikorrupsion, kjo e fundit zbardhi veprat penale për të cilat kryebashkiaku dyshohet se ka kryer.
Në një reagim për mediat, prokuroria speciale saktëson, se deri në këtë fazë të hetimit paraprak, nga provat e grumbulluara, është arritur në konkluzionin se ekzistojnë të dhëna konkrete, të cilat lidhen jo vetëm me veprën penale të parashikuar nga neni 260 i Kodit Penal, pra Korrupsion pasiv i funksionarëve të lartë shtetërorë ose vendorë, por edhe me veprat penale: “Korrupsion aktiv i funksionarëve të lartë shtetërorë ose të zgjedhurve vendorë”, “Pastrimi i produkteve të veprës penale ose veprimtarisë kriminale” dhe “Refuzim për deklarim, mosdeklarim, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë, ose i çdo personi tjetër që ka detyrim ligjor për deklarim”.
SPAK shton gjithashtu, se këto vepra janë pasqyruar tashmë edhe në Regjistrin e Njoftimeve të Veprave Penale pranë Prokurorisë së Posaçme kundër Korrupsionit dhe Krimit të Organizuar.
Sipas prokurorisë së posaçme, për këto vepra penale është bërë referim nga një individ në fillim të muajit shkurt të këtij viti, nga hetuesit e Byrosë Kombëtare të Hetimit dhe prokuroria regjistroi procedimin penal me nr: 27 të këtij viti, për veprën penale “Korrupsion pasiv i funksionarëve të lartë shtetërorë ose i të zgjedhurve vendorë”.
Për pretendimet e denoncuesit, SPAK thotë se janë verifikuar të dhënat dhe janë administruar prova dokumentare, mbi bazën e të cilave u regjistrua procedimi penal.
