Një këmbësor ka marrë lëndime trupore pasi është goditur nga një automjet në rrugën “Bill Klinton” në Prishtinë, sot në orët e mbrëmjes.
Rastin e ka konfirmuar zëdhënësja e Policisë për rajonin e Prishtinës, Flora Ahmeti, e cila ka thënë se këmbësori i lënduar është dërguar për tretman mjekësor.
“Sot rreth orës 19:00 në rrugën ‘Bill Klinton’ në Prishtinë, ka ndodhur një aksident trafiku në mes të një automjeti dhe një këmbësori. Si pasojë e aksidentit është lënduar këmbësori i cili është dërguar për tretman mjekësor”, ka thënë Ahmeti.
Sipas saj, me rastin po merret njësiti i trafikut.
