Lideri i AAK-së Ramush Haradianj që organizoi pritje për veteranët e UÇK-së në prag të Ditës së Veteranit që shënohet më 30 dhjetor, tha se UÇK-ja është guerila më e suksesshme e shekullit që lamë pas, dhe një Ushtri Çlirimtare që arriti të fitojë lirinë.
Por, sipas tij, statusi i veteranëve sot, nuk është në rregull, por tha se do të rregullohet njëherë e përgjithmonë.
Haradinaj tha se UÇK-ja do ta ketë shtëpinë në çdo komunë.
“Ajo shprehja që ka djem Kosova ekziston e unë besoj që ka djem Kosova dhe do të vijë dita që statusi i kategorive të lirisë do të rregullohet njëherë e përgjithmonë. Shoqatat do të jenë të mbështetura me buxhet e UÇK-ja do ta ketë shtëpinë e vetë në çdo komunë të Kosovës , do të jetë e identifikuar në çdo komunë të Kosovës”, tha ai.
2024-ën Haradinaj e quajti si vit të vështirë. “Uroj që vitin që vjen t’i kemi këtu bashkëluftëtarët që po kalojnë në procese gjyqësore në Hagë. Janë luftëtarë të lirisë, besojmë në pafajësinë e tyre”, u shpreh kreu i AAK-së.
Ai ka thënë se kujtojnë e nderojnë përherë sakrificën e familjes Jashari, komandantin legjendar Adem Jashari e çdo dëshmor e martirë të lirisë në të gjitha kohërat.
30 dhjetori është përcaktuar të jetë Dita e Veteranit sipas Ligjit për Veteranët e Luftës për të kujtuar sakrificën, angazhimin dhe kontributin e veteranëve për sjelljen e lirisë dhe pavarësisë për popullin e Kosovës.
Para 33 vjetësh, më 30 dhjetor 1991 nisi përballja e familjes Jashari me forcat ushtarake serbe në Prekaz, ku nga edhe filloi edhe rezistenca ushtarake e UÇK-së.
