Ish-redaktori i radios rinore B92 në Serbi, Veran Matiq, vuri në pah rëndësinë e protestave studentore që po ndodhin tash e sa muaj në Serbi, duke i konsideruar ato një pikë kthese në jetën politike të vendit.
Protestat studentore janë një moment kyç për politikën në Serbi, sepse tregojnë se si duhet të luftohet për parime dhe kërkesa të realizueshme, deklaroi Veran Matiq, gazetar dhe ish-drejtor i Radios B92. Duke folur për bllokadat aktuale të studentëve, ai kujton protestat studentore të viteve ’90, kur demonstruesit kërkuan lirimin e Radios së ndaluar B92 dhe arritën të realizonin qëllimet e tyre.
“Demonstratat e viteve 90-dhjeta patën suksesin e tyre, ato ishin së pari kryengritje studentore dhe më pas u shndërruan në protesta masive qytetare. Studentët i nisën, ata kanë udhëhequr një betejë autonome kundër regjimit te Milosheviqit, dhe më pas qytetarët iu bashkohen”, tha Matiq për RTK-në.
Veran Matiq, i cili mori pjesë në demonstratat e viteve ’90-ta, vlerëson se protestat aktuale kanë rëndësi, sepse nuk kanë fokus polarizimin mes pushtetit dhe opozitës, por iniciativat qytetare dhe studentore. Duke folur për dinamikën e protestave, Matiq thekson se gabimet e pushtetit, si dërgimi i huliganëve për të sulmuar protestat paqësore, vetëm sa e përshpejtuan përhapjen e protestave.
“Mendoj se kjo është një pikë kthese shumë e rëndësishme për politikën në Serbi. Deri më tani, ajo është kuptuar si diçka e ndarë në mënyrë radikale mes opozitës dhe pushtetit. Tani, studentët kanë ofruar një lloj edukimi për të gjithë, se në luftën për parime dhe kërkesa elementare të realizueshme është shumë e rëndësishme solidariteti, pavarësisht orientimit politik”, shtoi ai.
Matiq thekson se protestat aktuale ofrojnë shpresë, sepse janë një mundësi për një edukim më të gjerë të qytetarëve për pjesëmarrjen politike dhe veprimin e përditshëm, që është çelësi i ndryshimeve serioze shoqërore.
