Presidentja e Republikës së Kosovës Vjosa Osmani, ka qëndruar në veri të Mitrovicës. Në prag të festës së fundvitit, Osmani ka vizituar Drejtorinë e Policisë së Kosovës në Mitrovicë të Veriut. Ajo u shpreh se arsyeja e vizitës ishte për ta përgëzuar Policinë e Kosovës për punën e mirë dhe për t`i uruar ata për festat e fundvitit.
“Në radhë të parë ishim në vizitë në drejtorinë e Policisë për t’i falënderuar policët e të gjitha komuniteteve për shërbimin e tyre të çdo ditshëm në interes të të gjithë qytetarëve në mbrojtjen e jetës dhe pronës së tyre. Për t’i inkurajuar ata që edhe kur ka netë festash dhe ata sakrifikojnë duke qenë larg familjes së tyre dhe për t’iu dhënë gjithë mbështetjen e mundshme institucioneve të Kosovës”, ka deklaruar Osmani.
Presidentja Osmani nga veriu i ka uruar të gjithë qytetarët e Kosovës për vitin e ri, duke i uruar shëndet e lumturi. Ajo urimin e bëri edhe në gjuhën serbe.
“Shfrytëzoj rastin që t’i uroj të gjithë qytetarët e Kosovës të të gjitha etnive për festat e fundvitit duke iu dëshiruar të gjithëve shëndet dhe prosperitet me shpresën që viti 2025 do t’i sjell të gjitha të mirat për shtetin tonë”, ka theksuar Osmani.
Po ashtu, Osmani gjatë vizitës në veri është ndaluar edhe në një shtëpi në “Kroin e Vitakut”, si dhe ka vizituar disa biznese.
Në kuadër të kësaj vizite të fundvitit, presidentja Osmani ka shfrytëzuar rastin të shpërndajë dhurata për fëmijët në veri të Mitrovicës.
Gjatë vizitës në veri të Kosovës është e shoqëruar me ministrin e Punëve të Brendshme, Xhelal Sveçla, drejtorin e Përgjithshëm të Policisë, Gazmend Hoxha, si dhe kryetarin i Mitrovicës së Veriut, Erden Atiq.
