RUSIA ka kërcënuar me hakmarrje pasi njoftoi se ka rrëzuar tetë raketa amerikane ATACMS të lëshuara nga Ukraina këtë mëngjes. Moska e sheh përdorimin e raketave të tilla, të cilat kanë një rreze veprimi deri në 300 kilometra, si një përshkallëzim të madh të konfliktit.
Ministria ruse e Mbrojtjes tha se sistemet e mbrojtjes ajrore rrëzuan tetë raketa balistike së bashku me 72 dronë. Ata shtuan se “këto veprime të regjimit në Kiev, të cilat mbështeten nga kuratorë perëndimorë, do të përgjigjen me hakmarrje”. Ministria raportoi se këto raketa ishin drejtuar në rajonin Bryansk, duke pretenduar se nuk kishte dëme apo viktima.
Ministria ruse gjithashtu në një deklaratë thekson se ata shkatërruan disa dronë në rajonin e Leningradit në veriperëndim dhe një në Kursk, ku Ukraina kreu një sulm të befasishëm verën e kaluar.
Putin kërcënon: Do t’i përgjigjemi Oreshnikut
Presidenti amerikan në largim Joe Biden autorizoi përdorimin e raketës ATACMS nga Kievi në nëntor, duke thënë se kjo ishte pjesërisht në përgjigje të përfshirjes së trupave të Koresë së Veriut në luftë. Presidenti rus Vladimir Putin ka kërcënuar se do t’i përgjigjet sulmeve me raketa ATACMS të Ukrainës duke përdorur raketën e re balistike hipersonike Oresnik.
Muajin e kaluar, Putin sugjeroi se një raketë e tillë mund të hidhej në kryeqytetin Kiev për të “testuar sistemet e mbrojtjes ajrore të furnizuara Ukrainës nga Perëndimi”. Lëshimi i parë dhe i vetëm i kësaj arme eksperimentale u bë më 21 nëntor të vitit të kaluar dhe kishte në shënjestër rajonin Dnipro.
Dhe rusët lëshuan dhjetëra dronë
Sulmet me dron të Ukrainës kanë detyruar autoritetet të vendosin kufizime të përkohshme në aeroportin e Shën Petersburgut, njoftoi agjencia shtetërore ruse e mediave TASS. Guvernatori i rajonit të Leningradit, Aleksandar Drozdenko, tha në Telegram se “nata dhe mëngjesi i sotëm ishin një rekord për numrin e dronëve të shkatërruar”, me katër të rrëzuar mbi rajonin e tij.
Zyrtari ukrainas i sigurisë Andriy Kovalenko tha se porti i Leningradit ishte në shënjestër, duke e quajtur atë “një instrument të mbijetesës ekonomike dhe ushtarake për Rusinë”. Në të njëjtën kohë, Rusia lëshoi gjithsej 81 dronë në Ukrainë gjatë natës nga e premtja në të shtunë, sipas Komandës së Forcave Ajrore të Ukrainës, duke përfshirë dronët iranianë Shahed.
Një vit i vështirë për Ukrainën
Ukraina hyn në vitin e ri në disavantazh në luftën që filloi në shkurt 2022, ndërsa Rusia po bën përparim në frontet lindore.
Ministria ruse e Mbrojtjes tha këtë mëngjes se forcat e saj kanë marrë kontrollin e fshatit Nadia në rajonin lindor të Ukrainës Luhansk. Në Donetsk, qendra e Pokrovsk është nën presion në rritje nga Rusia pasi forcat ukrainase humbasin terren në jug dhe në lindje të qytetit.
