Zjarri në një qendër tregtare në Dallas ka vrarë më shumë se 500 kafshë në një dyqan kafshësh. Kafshët që ngordhën nga thithja e tymit pas zjarrit përfshinin qen, mace dhe pula, thanë autoritetet. Më konkretisht, 579 kafshë, shumica e të cilave ishin zogj të vegjël, ndodheshin në një dyqan kafshësh në Plaza Latina në Dallas të Teksasit, ku një zjarr shpërtheu dje, raporton Sky News .
Rreth 45 zjarrfikës luftuan me zjarrin për dy orë, tha zëdhënësi i DFR (Dallas Fire and Rescue), Jason Evans. Edhe pse flakët nuk i kapën kafshët, ato vdiqën nga thithja e tymit. Sipas Evans, qindra zogj ngordhën, si dhe pula, lloj brejtësish, dy qen dhe dy mace.
Nuk ka pasur persona të lënduar
“Megjithë përpjekjet tona të kërkimit dhe shpëtimit, të gjitha kafshët në dyqan fatkeqësisht ngordhën nga thithja e tymit”, tha Evans.
Nga zjarri nuk ka të lënduar, i cili ka dëmtuar rëndë strukturën e qendrës tregtare njëkatëshe dhe ka shembur pjesërisht çatinë. Shkaku i zjarrit është ende nën hetim.
Në faqen e saj në Facebook, Plaza Latina përshkruhet si një vend ku njerëzit mund të hanë dhe të blejnë për një sërë produktesh dhe shërbimesh të Amerikës Latine. Njoftimi në spanjisht bën thirrje për lutje për familjet që punonin atje dhe thekson se qendra tregtare do të jetë e mbyllur deri në një njoftim të dytë.
