Derisa numri i rasteve të prekur nga gripi është rritur ditëve të fundit, Instituti Kombëtar i Shëndetësisë Publike të Kosovës (IKSHPK) u ka bërë thirrje qytetarëve që të vaksinohen kundër gripit sezonal.
Sipas IKSHPK-së rritja e rasteve me grip ka rezultuar edhe me rritje të fluksit të qytetarëve që po kërkojnë ndihmë mjekësore në institucionet shëndetësore.
“Gripi sezonal është sëmundje akute infektive e cila te një numër i konsideruar i rasteve shkakton komplikime serioze shëndetësore, veçanërisht te fëmijët, të moshuarit dhe ata me sëmundje kronike, ndërsa vaksina kundër gripit është mënyra më e mirë për të reduktuar rrezikun e infektimit dhe përhapjen e virusit”, thuhet në thirrjen e institutit.
Sipas tyre, duke qenë që sezoni i gripit zgjatë edhe për disa muaj, u bëjnë thirrje të gjithë qytetarëve pa dallim moshe që të vaksinohen si masë parandaluese kundër gripit, me theks të veçantë grupeve me prioritet si: punëtorët shëndetësor, gratë shtatzëna, personat me sëmundje kronike dhe me imunitet të komprometuar, personat mbi 65 vjeç dhe fëmijët e moshës nga 6 muaj deri në 5 vjeç me indikacione shëndetësore.
Kanë bërë të ditur se Ministria e Shëndetësisë ka siguruar për këtë sezon të gripit 85 mijë doza të vaksinës dhe qytetarët mund të vaksinohen në secilën komunë, në qendrën më të afërt të Mjekësisë familjare.
Në të njëjtën kohë, IKSHPK u bën thirrje qytetarëve që të zbatojnë edhe masa të tjera parandaluese si: mbajtjen e higjienës personale, evitimin e kontakteve të afërta me individë të sëmurë, reduktimin e vizitave të familjarëve tek personat e hospitalizuar, evitimin e vendeve të mbyllura dhe të mbingarkuara me njerëz, etj.
“Vaksinimi mbetet mënyra më efikase për parandalimin e virusit të gripit, ndërsa efekti i saj fillon 1 deri 2 javë pas marrjes, ndërsa mbrojtja vazhdon rreth një vit pas vaksinimit”, thuhet në thirrjen e IKSHPK-së.
