Në Komisionin Qendror të Zgjedhjeve nuk arriti t’i merrte votat e anëtarëve, rekomandimi i Zyrës për Regjistrim, Certifikim dhe Kontrollin Financiar të Subjekteve Politike për ndarjen e mjeteve nga Fondi për mbështetje për subjektet politike të përfaqësuara në Kuvendin e Kosovës për periudhën dymujore janar – shkurt 2025. Shkak për këtë ishte përfshirja Listës Serbe në mesin e 14 partive përfituese që do të përfitonin nga fondi për demokratizim, i cili ndahet çdo fillimvit nga KQZ-ja.
Vendimmarrja u pamundësua për shkak se 4 përfaqësuesit e opozitës nga PDK, LDK dhe AAK nuk morën pjesë në votim, ndërkaq përfaqësuesit e VV-së votuan kundër.
Madje aty doli edhe një tjetër rekomandim nga anëtari i KQZ-së, Alban Krasniqi i Vetëvendosjes i cili kërkoi që miratimi të bëhej për secilin subjekt veç e veç.
“Edhe pse mund të rekomandojë që Kuvendi nuk është aktiv në punën e tij shuma e secilit subjekt duhet të jetë në përputhje siç e sheh ligji. Si shumë nuk mendoj që zyra ka të drejtën të ndalë shumën një subjekti. Totali i asaj shume i takon subjekteve politike. Ky rekomandim apo miratimi të jetë i veçantë për secilin subjekt dhe jo në përgjithësi”, tha ai.
As ky rekomandim nuk u miratua nga KQZ-ja pasi nuk pati vota të mjaftueshme për të.
Sami Kurteshi që po ashtu e përfaqëson Vetëvendosjen në tryezën e KQZ-së tha se nuk ka votë për ndarje të mjeteve edhe për Listën Serbe. Ai tha se qëndrimin për këtë çështje e ka dhënë tashmë.
“Jam kundër ndarjes së mjeteve të ndara për Listën Serbe i kam dhënë argumentet e mija dhe vota ime është kundër ndarjeve të mjeteve për këtë subjekt”, tha Kurteshi.
Sipas rekomandimit, subjektet politike që do të përfitonin janë: Lëvizja Vetëvendosje – 353,898.31 euro. Partia Demokratike e Kosovës– 115,932.20 euro. Lidhja Demokratike e Kosovës – 91,525.42 euro. Lista Serbe – 54,915.25 euro. Aleanca për Ardhmërinë e Kosovës– 48,813.56 euro. Kosova Demokratik Turk Partisi – 12,203.39 euro. Za Slobodu Pravdu I Opstanak– 6,101.69 euro. Koalicija Vakat– 6,101.69 euro. Iniciativa e Re Demokratike e Kosovës – 6,101.69 euro. Romani Iniciyaiva – 6,101.69 euro. Nova Demokratska Stranka– 6,101.69 euro. Socialdemokratska Unija – 6,101.69 euro. Jedinstvena Goranska Partija – 6,101.69 euro. Lëvizja Përparimtare e Romëve të Kosovës – 6,101.69 euro.
Në këtë mbledhje KQZ-ja ka miratuar edhe fletën e votimit për zgjedhjet e 9 shkurtit.
Në anën e majtë të fletëvotimit janë të renditur numrat dhe emrat e 38 subjekteve politike nga 111 deri në 138, ndërsa në anën e djathtë numrat nga 1 deri në 110 ku qytetarët do të mund të votojnë deri në dhjetë kandidatë për deputetë.
