Shkruan: Hyzri SALIHU
Gjëja më e përfolur në Shqipëri dhe Kosovë është veprimtaria e disa politikanëve. Ata etiketohen me lloj-lloj gjërash, të cilat të gjitha kanë një emërues të përbashkët: korrupsionin.
Që nga kreu i ekzekutivit e deri te disa ministra, deputetë, madje edhe drejtorë shkollash e qerdhesh, të gjithë janë të korruptuar, të gjithë merren me tregti dhe kontrabandë.
E, ç’siguri mund të kenë për biznesmenët e huaj një gjendrim i tillë, kur ata, pasi vijnë në Shqipëri ose Kosovë, kontakti i parë që bëjnë është me qeveritarët tanë, të cilët i shikojnë nga duart, apo nga xhepat e mbushur.
Kreu i qeverisë bën sikur hedh një tollumbace për pengimin e kontrabandës apo ndalimin e korrupsionit, por ato ose janë pa vlerë, ose vartësit e tij direkt tallen me të, duke i thënë në heshtje: “Vazhdo, vazhdo ti, se mirë e ke, ne kemi punën tonë.”
Në këtë kohë që Shqipëria dhe Kosova kanë shumë halle, populli diskuton për politikën dhe për politikanët.
Nuk ka vend, familje, lokal, dasëm apo vdekje që të mos dëgjosh ose të mos nisë menjëherë një diskutim për politikën.
Të gjithë janë bërë ekspertë, të gjithë janë profesionistë.
Të mjerët politikanët tanë me kë u ka rënë. Kush të lë këtu të bësh ti profesionistin e politikës? Atë e bën shitësi i bananeve, berberi, shoferi, madje edhe muratori e magazinieri.
Nuk i dallon dot në Shqipëri dhe Kosovë se cili është më i zoti në politikë, një deputet, një gazetar, një drejtor shkolle apo një shofer.
Të gjithë thajnë. Të gjithë të japin ujë në bisht të lugës.
Përveçse diskutimi për politikën, nuk bëhet asgjë që të gjejë zgjidhje për atë që është thelbësorja: politika. Ç’i duhet muratorit politika, apo shoferit, madje dhe shitësit të bananeve? I duhet, sepse ajo nuk i duhet politikanit, ose më mirë, atë nuk e bën dot politikanin.
Po ta bënte ai, zgjidhjet do të ishin gjetur dhe Shqipëria dhe Kosova do të ecin përpara.
Por disa politikanë tanë çdo gjë bëjnë, vetëm politikë jo. Ata bëjnë reter, tregti, dhe populli diskuton për politikë, pra rreh ujë në havan, ndërsa politikanët mbushin xhepat.
