Koalicioni i Aleancës për Ardhmërinë e Kosovës me Nismën, Listën Konservatore dhe Forumin Intelektual E-30 ka mbajtur sot tubimin elektoral në sallën “1 Tetori” në Prishtinë.
Kandidati për kryeministër i këtij koalicioni, Ramush Haradinaj, ka thënë se ‘nuk duan’ pagë nën 1 mijë euro në sektorin publik, pagë minimale nën 500 euro dhe pension nën 500 euro.
“Ne duam siguri ekonomike, i duam bizneset e Kosovës të fuqishme e të suksesshme, i duam si partnerë e investitorëve të jashtëm, i duam si vlerë e shtuar, i duam si partnerë për projekte publiko – private, duam zona biznesore në çdo komunë të Kosovës”, ka thënë Haradinaj para mbështetësve të tij.
Kreu i Nismës, Fatmir Limaj, në anën tjetër ka listuar investimet që do të bëhen nga ana e tyre si premtim elektoral.
“Ne bëmë autostradën ‘Arben Xhaferi’, duam të vazhdojmë ta kryejmë autostradën e Gjilanit dhe Vitisë. Ne bëmë veprën e madhe, autostradën e Kombit, duam ta bëjmë autostradën e Dukagjinit. Ne bëmë Aeroportin e Prishtinës, kësaj radhe do ta bëjmë të Gjakovës. Ne nga veprat shkojmë në vepra për Kosovën fituese”, ka premtuar Limaj.
