Kandidati për kryeministër i koalicionit AAK, Nisma, Lista Konservatore dhe Forumi Intelektual E-30, Ramush Haradinaj, ka bërë të ditur se Aleancës sot iu bashkua Dr. Shkelzen Komoni, një prej kirurgëve më të njohur maksillofacial.
Haradinaj e vlerësoi Shkelzen Komonin për përvojën e tij të pasur profesionale dhe angazhimin e tij humanitar.
“Shkelzeni është një profesionist i njohur dhe një njeri me një aktivitet të pasur sindikalist. Pjesëmarrja e tij do ta pasurojë organizatën tonë të përbashkët, pasi ai ka një përvojë të pasur dhe një karakter të shëndoshë”, tha Haradinaj.
Nga ana e tij, Dr. Shkelzen Komoni shprehu kënaqësinë për t’u bashkuar me koalicionin e Kosovës fituese.
“Jam i nderuar që po bashkohem me këtë ekip dhe do të kontribuoj me përvojën time për një Kosovë më të mirë, të drejtë dhe të zhvilluar,” tha Komoni.
Haradinaj gjithashtu theksoi se Komoni ka një trashëgimi të pasur familjare atdhetare dhe intelektuale me origjinë nga Gjakova.
“Shkelzeni është i lindur në Prishtinë, dhe është një personalitet i respektuar për humanitetin, pozitivitetin dhe optimizmin e tij,” shtoi Haradinaj.
